करण तामाङ
काठमाडौ । दुप्चेश्वर गाउँपालिका वडा नम्बर ३ स्थित फपरखेल नुवाकोटी ६ वर्षकी ब्रेन ट्युमर बिरामी पासाङ माया तामाङलाई स्वस्थ्य लाभको कामना सहित राष्ट्रिय संगीतकर्मी संघ जिल्ला कार्यसमिति नुवाकोट र माङसाम युवा बचत कोषले नगद रु ८०,००० सहयोग प्रदान गरेको छ ।

विगत लामो समय देखि परेको बिरामी बालिकाको स्वस्थ्य उपचारमा आर्थिक सहयोग अपिल भए अनुसार दुप्चेश्वरकै समाजसेवी कलाकार साथै राष्ट्रिय संगीतकर्मी संघ नुवाकोटका अध्यक्ष बिकी लामा लो र समाजसेवी सन्देव तामाङको पहल र नेतृत्वमा गत हप्ता आर्थिक सहयोग प्रदान गरेको हो । उपचारको लागि धेरै खर्च भैरहेको र आर्थिक अवस्था बलियो नभएको कारण उपचारमा समस्या आउन सक्ने भन्दै समस्या नहोस भन्नका लागि आर्थिक सहयोग गरेको सन्देव तामाङ र बिकि लामा लोले बताएका छन् । बिरामीकै घरमा पुगेर सो रकम माङसाम युवा बचत कोष र राष्ट्रिय संगीतकर्मी संघ नुवाकोटको टिमले हस्तान्तरण गरेको थियोे ।

सामाजिक परिवर्तन, विकास र सुख दुस्खको सारथीका लागि पनि माङसाम युवा बचत कोष निर्माण भएको उक्त टिमले बताएको छ । र, राष्ट्रिय संगीतकर्मी संघ पनि निरन्तर सामाजिक सेवा र साँस्कृतिक पक्षमा योगदान प्रदान गर्दै आएको संस्था हो । अप्ठ्यारोमा परेको बेला यसरी हातेमालो गरेकोमा दुवै संस्थाको टिम र सबैलाई बिकी लामा लोले धन्यवाद व्यक्त गरेका छन् ।