काठमाडौं । नेपालीलाई अवैध बाटोबाट रुसी सेनामा भर्ती हुन पठाउने गिरोहका १२ जनालाई नेपाल प्रहरीले पक्राउ गरेको छ ।

काठमाडौंको विभिन्न ठाउँबाट उनीहरूलाई पक्राउ गरिएको जानकारी प्रहरी स्रोतले दाबी छ । स्रोतले भन्यो-हालसम्म १२ जना पक्राउ परेका छन् । अझै अनुसन्धान र खोजी जारी छ ।

पक्राउ पर्नेमा हरि बिक र सुजाता दाहाल छन् । उनीहरु नै मुख्य नाइके रहेका प्रहरीको दाबी छ । बाँकी १० जनाको परिचय भने स्रोतले खुलाउन चाहेन ।

प्रहरीको प्रारम्भिक अनुसन्धानका क्रममा उनीहरूले नेपालीलाई भारतको दिल्ली हुँदै रुस पठाउने गरेको पाइएको छ । नेपालस्थित भारतीय दुतावासबाट ‘नो अब्जेक्सन लेटर’ बनाएर दिल्लीबाट रुस पठाउने गरेको अनुसन्धानमा खटिएका प्रहरी अधिकारीको दाबी छ ।

नेपाल प्रहरीले भारतीय दुतावाससँग समेत यस विषयमा छलफल गरेको छ । मानव तस्कर समूहले रुस पठाउन प्रतिव्यक्ति १२ लाख रुपैयाँ असुल गर्ने गरेको प्रहरीको अनुसन्धानबाट खुलेको छ ।