बर्दिया । बर्दियामा अविरल वर्षासँगै आएको बाढीले विभिन्न ठाउँहरू जलमग्न बनेका छन् । गए रातिदेखि परेको अविरल वर्षासँगैको बाढीले बर्दियाका दर्जनौं बस्ती डुबानमा परेका हुन् । पूर्वपश्चिम राजमार्गको सडक छेउसम्मै पानी भरिएको छ । राजमार्ग छेउमा भरिएको पानीले यातायात नै अवरुद्ध हुने अवस्था आएको हो ।

बारबर्दिया नगरपालिका र बाँसगढी नगरपालिकाका विभिन्न ठाउँका साढे दुई सय जति घरहरू डुबानमा परेको त्यहाँस्थित हाम्रा संवाददाता यमनाथ घिमिरेले जानकारी दिएका छन् । उनका अनुसार डुबानमा परेका बस्तीका बासिन्दालाई उद्धारगरी सुरक्षित स्थानमा राखिएको छ ।

अहिले पनि पानी परिरहेको छ । यहाँका नदीको जलसतह खतराको तह आसपास पुगेको छ,ु उनले भने, ुबासगढी बारबर्दियाका २५० जति घरहरू डुबानमा परेका छन् । स्थानीयलाई उद्धारगरी सुरक्षित स्थानमा राखिएको छ ।

बाढीमा तीन जना हराइरहेको उनले बताए । उनका अनुसार बबई नदी आसपास दाउरा लिन गएका तीन पुरुष हराएका हुन् । उनीहरूको खोजी कार्य भइरहेको उनले बताए ।

बर्दियामा आज भारी वर्षा भएको छ । बाढी पूर्वानुमान महाशाखाका अनुसार बर्दियाको रम्भापुर र रानी वर्षामापन केन्द्र आसपासको क्षेत्रमा भारी वर्षा मापन भएको हो ।