काठमाडौं । स्वास्थ्य तथा जनसंख्यामन्त्री मोहनबहादुर वस्नेतले स्वास्थ्य क्षेत्रमा देखिएका विकृति र विसंगतिको अन्त्य गर्ने प्रतिबद्धता जनाएका छन् । उनले स्वास्थ्य सेवा पाउनु नागरिकको पहिलो हक भएको भन्दै त्यसै अनुसारका कार्यक्रम सञ्चालन गर्दै आएका छन् ।

सिन्धुपाल्चोक– २ बाट प्रतिनिधिसभाको निर्वाचन जितेका वस्नेतले मन्त्रालयसँग सम्बन्धित विषयमा पटक पटक सरोकारवालासँग छलफल पनि गर्दै आएका छन् । उनले नेपालकै पुरानो सरकारी अस्पतालका रुपमा चिनिने वीर अस्पतालालाई व्यवस्थित गर्ने र सबैको भरोसाको केन्द्र बनाउने बताइरहेका छन् । सरकारी अस्पतालमा बिरामीले भोग्नुपरेको दुःखका बारेमा पनि उनी चिन्तित रहेका छन् । उनले अस्पताल प्रशासनलाई सेवाग्राहीको उपचारलाई सरल र व्यवस्थित गर्न भन्दै आएका छन् । यसअघि उपचार गर्ने पैसाको अभावमा धेरै नागरिकले ज्यान गुमाउनुपरेको भन्दै उनले अब भनें त्यस्तो अवस्था आउन नदिने बताएका छन् । केही दिनअघि काभ्रेमा आयोजित एक कार्यक्रममा उनले उपचारको अभावमा कुनै पनि नागरिकले अकालमा ज्यान गुमाउनु नपर्ने बताए ।

२०७४ सालको प्रतिनिधिसभाको निर्वाचनमा सिन्धुपाल्चोक –१ बाट पराजित भए पनि उनले जिल्लाका मात्र होइन अन्य क्षेत्रका नागरिकका लागि पनि शिक्षा र स्वास्थ्यमा आफ्नो व्यक्तिगत तर्फबाट ठूलो लगानी गरेका थिए । उनले त्यतिबेला धेरै विद्यार्थीलाई आफ्नो खर्चमा विद्यालय तथा क्याम्पस पठाइदिएका थिए । उनले अझै पनि यो अभियान चलिरहेको बताएका छन् । जिल्लामा गएको बाढीपहिरोका साथै अन्य प्राकृतिक प्रकोपमा पनि उनी सक्रिय भएर राहत र उद्धारमा लागेका थिए । उनी त्यतिबेला आफू सांसद नभए पनि जनताको काममा लागेको बताएका थिए । उनले त्यसै क्षेत्रबाट निर्वाचित सांसद र सरकार पुग्नुभन्दा अघि आफू पुगेको पनि दाबी गरेका थिए । यसअघि क्षेत्र नम्बर १ बाट निर्वाचन जितेका उनले गत मंसिरमा भएको निर्वाचनमा भनें अर्को क्षेत्रमा उम्मेदवार भएर जितेका हुन् ।
मन्त्री वस्नेतकै अग्रसरतामा अब अस्पतालले उपचारका क्रममा हुने मृत्युको अडिट रिपोर्ट तयार पारेर स्वास्थ्य तथा जनसंख्या मन्त्रालयको स्वास्थ्य सेवा विभागमा पठाउनुपर्ने भएको छ । स्वास्थ्य तथा जनसंख्या मन्त्रालयले सबै अस्पतालहरुलाई उपचार गरेका बिरामीको मृत्यु भएमा मृत्युको कारण पहिचान गरी प्रतिवेदन पठाउन आग्रह गरेको छ । स्वास्थ्य मन्त्रालयको मंगलबारको सचिवस्तरीय निर्णय अनुसार स्वास्थ्य मन्त्रालयकी वरिष्ठ अस्पताल नर्सिङ प्रशासक शकुन्तला प्रजापतिले सबै अस्पताललाई अस्पतालमा मृत्यु भएकाको मृत्युको कारण पहिचान प्रतिवेदन पठाउन पत्राचार गरेकी हुन् ।

मन्त्रालयले सबै संघीय, प्रादेशिक, स्थानीय र निजी तथा सामुदायिक अस्पतालहरुलाई स्वास्थ्य संस्थामा उपचारको क्रममा मृत्यु भएकाको मृत्युको कारण पहिचान गरी त्यसको प्रतिवेदन पठाउन पत्राचार गरेको हो । प्रतिवेदन स्वास्थ्य सेवा विभागको उपचारात्मक सेवा महाशाखामा पठाउनुपर्ने छ । उक्त रिर्पोटले मृत्युको ट्रेन्ड कस्तो छ ? कुन रोग, के कारणले बढी मृत्यु हुँदो रहेछ ? भन्ने यथार्थ जानकारी हुने भएकोले मृत्यु अडिट गर्न लागेको मन्त्रालयका अधिकारी बताउँछन् ।
यसअघिका कुनै पनि स्वास्थ्यमन्त्रीले यो व्यवस्था गरेका थिएनन् । विभिन्न रोगका कारण मानिसको अकालमा मृत्यु भएको र कतिपय रोगको पहिचान नै नहुँदै मानिसको ज्यान जाने गरेकाले मन्त्री वस्नेतको अग्रसरतामा मन्त्रालयले यस्तो निर्णय गरेको जनाइएको छ । मन्त्री वस्नेतको कामलाई नागरिकले सकारात्मक रुपमा हेरेका छन् ।