काठमाडौं । चीनको सांघाइमा बस्ने एक महिलाले पिरो र मसालेदार खाना खाँदा करङका चारवटा हड्डी नै भाँचिएको छ । छाति दुखेर केही दिनपछि डाक्टरकोमा चेकजाँच गराउन जाँदा मात्रै उनले आफ्नो करङ भाँचिएको थाहा पाइन् ।

साउथ चाइना मर्निङ पोस्टका अनुसार उनको नाम हुआंग हो । हालै एकदिन पिरो खानेकुरा खाने क्रममा उनलाई खोकी सुरु भयो । निकैबेर सम्म जोडसँग खोक्दा उनको छातिमा दबाब पर्‍यो र उनले आफ्नो छातिबाट तीव्र कर्कश आवाज सुनिन् । केही दिनपछि त उनलाई स्वास फेर्न र बोल्न नै अप्ठेरो हुन लाग्यो ।

छातीको दुखाई तीव्र बनेसँगै उनी चेकजाँचका लागि अस्पताल पुगिन्। त्यहाँ सिटी स्क्यान गर्दा उनको छातीका चार वटा करङ भाँचिएको डाक्टरहरुले पत्ता लगाए । डाक्टरहरूले एक महिनासम्म उनको कम्मर र छातीमा पट्टी बाँध्न लगाएका छन् ।

हाल स्वास्थ्यलाभ गरिरहेकी हुआंगले चोट निको भएसँगै आफ्नो मांशपेशी तथा वजन बढाउनका लागि व्यायाम गर्ने बताएकी छिन् । एजेन्सी