हेटौडा । आजबाट शुरु भएको माध्यमिक शिक्षा परीक्षा (एसईई) को बागमती प्रदेशका आन्तरिक मामिला तथा कानुनमन्त्री तथा सरकारका प्रवक्ता गंगानारायण श्रेष्ठले अनुगमन गर्नुभएको छ ।

हेटौंडाको आधुनिक राष्ट्रिय मावि र भूटनदेवी मावि परीक्षा केन्द्र पुगेर मन्त्री श्रेष्ठले विद्यार्थीहरूलाई परीक्षाको सफलता र उनीहरूको सुखद भविष्यको शुभकामना दिनुभएको मन्त्रीको सचिवालयले जनाएको छ । मन्त्री श्रेष्ठले परीक्षा अनुशासित, मर्यादित, सुरक्षित र व्यवस्थित रहेकोमा खुसी व्यक्त गर्दै परीक्षा केन्द्राध्यक्षलगायत टीमलाई धन्यवाद दिनुभएको छ । साथै परीक्षालाई अनुशासित, मर्यादित, सुरक्षित र व्यवस्थित बनाउन बागमती प्रदेश सरकारले सम्बन्धित सबै निकायलाई आवश्यक निर्देशन दिएको पनि सचिवालयले जनाएको छ । त्यस्तै मन्त्री श्रेष्ठले विशेष अवस्थाका परीक्षार्थीलाई समेत हौसला प्रदान गर्नुभएको थियो । उहाँले स्वास्थ्यकर्मीहरुलाई शतर्क रहन पनि आग्रह गर्नुभयो ।

चैत २९ गतेसम्म चल्ने यस वर्षको एसईई परीक्षामा करिब ५ लाख परीक्षार्थी सहभागी भएका र त्यसमध्ये करिब २० प्रतिशत परीक्षार्थी बागमती प्रदेशमा रहेका छन । त्यस्तै एसईई परीक्षाका लागि ७७ जिल्लामा २ हजार ३६ परीक्षा केन्द्रमध्ये सबैभन्दा बढी परीक्षा केन्द्र बागमती प्रदेशमा रहेको जानकारी सामजिक विकास मन्त्रालयका शाखा अधिकृत विजय बिडारीले जानकारी दिनुभयो । वागमती प्रदेशका १ लाख १ हजार ७३ सय ३३ परीक्षार्थीका लागि ४ सय ३४ परीक्षा केन्द्र रहेको अधिकृत बिडारीले जानकारी दिनुभएको छ ।