काठमाडौं । पाकिस्तानका पूर्व प्रधानमन्त्री इमरान खानविरुद्ध अदालतले गिरफ्तारी दिन आग्रह गरेको छ।

खानलाई पक्राउ गर्न गएको प्रहरीलाई समर्थकहरुले घेराबन्दी गरेर फर्काइदिएपछि अदालतले आफैँ उपस्थित भएर आत्मसमर्पण गर्न आदेश दिएको हो। त्यसो नगरे प्रहरीले पक्राउ गरेर उपस्थित गराउने भन्दै अदालतले गिरफ्तारीको वारेन्ट रद्द नहुने दोहोर्‍याएर खानमाथि दबाब बढाएको हो। इस्लामावाद उच्च अदालतमा खानको गिरफ्तारी वारेन्ट रद्द गर्न माग गर्दै परेको रिटमा अदालतले यस्तो आदेश दिएको हो।

खानविरुद्ध अहिले सरकारी संरक्षित खजना सस्तो मूल्यमा खरिद गरेर अर्बौँ रुपैयाँ बिक्री गरेको आरोपमा अदालतले गिरफ्तारीको आदेश दिएको थियो। यसअघि अदालतको मानहानी, न्यायाधीशहरुविरुद्ध खराब अभिव्यक्ति, राज्यद्रोहलगायतक कयौँ मुद्दा खानविरुद्ध दर्ता भएका छन्।

तर, पछिल्लो पटक सरकारी खजानाको मुद्दामा इस्लामावाद उच्च अदालतले तत्काल पक्राउ गर्न आदेश दिएपछि खानको घर पार्टी कार्यकर्ताहरुले घेरा हालेर प्रहरीलाई पक्राउ गर्न दिएका थिएनन्।
त्यसबाहेक गिरफ्तारीविरुद्ध परेको रिटसमेत अदालतले खारेज गरिदिएपछि खानमाथि दबाब बढेको हो। (एजेन्सी)