काठमाडौं। नेकपा माओवादी केन्द्रका नेता हरिवोल गजुरेल उपराष्ट्रपति पद अस्वीकार गरेका छन् ।

लामो समयदेखि पार्टीमा समस्या देखिएको बताउँदै उनले पार्टी बनाउने अभिभारा आफूले पूरा गर्न तत्काल कुनै पनि राजकीय पदमा आफू नजाने बताएका छन्।

अध्यक्ष प्रचण्डले आफूलाई लाभका पदमा अफर गरे पनि निरन्तर पार्टीमै कार्यकारी भूमिकामै रहने इच्छा ब्यक्त गरेका छन्। उनलाई आइतबाार प्रधानमन्त्रीसमेत रहेका मओवादी केन्द्रका अध्यक्ष पुष्पकमल दहाल प्रचण्डले उपराष्ट्रपति लगायत अन्य कुनै लाभको पदको अफर गरेका थिए। तर, गजुरेलले त्यसलाई अस्वीकार गरेका हुन्।

उनले भने, ‘मूल विषय पार्टी बनाउने र माओवादी आन्दोलनका उपलब्धिको रक्षा गर्ने हो। म अझै पार्टीको काम गर्न सक्षम छु त्यसैले कार्यकारी भूमिका दिए ठोस र परिणाममुखी नतिजा ल्याउने छु।’

पार्टीमा आफूले कार्यकारी भूमिकासहितको जिम्मेवारीको अपेक्षा गरेको बताउँदै उनले अगाडि भने, ‘म पार्टीमा देखिएको समस्या निराकरण गर्ने अहिलेको मुख्य चुनौती भएकाले पार्टीको सांगठनिक अवस्थालाई पुर्नजिवित तुल्याउन कार्यकारीे भूमिकाको अपेक्षा गरेको छु।’