काठमाडौं । हिजो राति फिफा विश्वकप फुटबलको उपाधि अर्जेन्टिनाले जितेको छ । दोहास्थित लुसेल स्टेडियममा भएको फाइनलमा फ्रान्सलाई पेनाल्टी सुटआउटमा ४–२ ले हराउँदै अर्जेन्टिनाले विश्वकप उपाधि जितेको हो । ऊ तेस्रोपटक विश्व च्याम्पियन बन्यो ।

उपाधिसँगै अर्जेन्टिनाले १८ क्यारेट सुन जडित ट्रफीसहित अर्बौं रुपैयाँ पुरस्कार प्राप्त गरेको छ । उसले ४२ मिलियन अमेरिकी डलर अर्थात् ५ अर्ब ५७ करोड ९६ लाख ३२ हजार ८ सय रुपैयाँ पुरस्कार पाएको हो ।

अर्जेन्टिनाले हालसम्मकै सर्वाधिक पुरस्कार राशि पाएको हो । त्यस्तै, उपविजेता फ्रान्सले ३० मिलियन अमेरिकी डलर अर्थात् ३ अर्ब ९८ करोड ५४ लाख ५२ हजार रुपैयाँ पुरस्कार पाएको छ ।

यस्तै, तेस्रो बनेको क्रोएसियाले २७ मिलियन अमेरिकी डलर (३ अर्ब ५८ करोड ६९ लाख ६ हजार ८ सय) तथा चौथो भएको मोरोक्कोले २५ मिलियन अमेरिकी डलर (३ अर्ब ३२ करोड १२ लाख १० हजार) पुरस्कार प्राप्त गर्‍यो ।

क्वार्टरफाइनलबाट बाहिरिने पोर्चुगल, इङ्ग्ल्यान्ड, ब्राजिल र नेदरल्याण्ड्सले १७ मिलियन अमेरिकी डलर अर्थात् २ अर्ब ५८ करोड ८४ लाख २२ हजार ८ सय रुपैयाँ पुरस्कार पाए ।

यस्तै, अन्तिम १६ मा पुग्ने स्विटजरल्याण्ड, स्पेन, पोल्याण्ड, सेनेगल, दक्षिण कोरिया, जापान, अस्ट्रेलिया र अमेरिकाले १३ मिलियन अमेरिकी डलर अर्ब १ अर्ब ७२ करोड ७० लाख २९ हजार २ सय रुपैयाँ प्राप्त गरे ।

समूह चरणबाट बाहिरिने घाना, उरुग्वे, सर्बिया, क्यामरुन, क्यानडा, बेल्जियम, कोस्टारिका, जर्मनी, डेनमार्क, ट्यूनिसिया, साउदी अरेबिया, मेक्सिको, वेल्स, इरान, इक्वेडर र कतारले ९ मिलियन अमेरिकी डलर (१ अर्ब १९ करोड ५६ लाख ३५ हजार ६ सय) प्राप्त गरेका छन् ।