काठमाडौं । ब्राजिलका महान फुटबलर पेलेले गएराति कतारमा सम्पन्न २२ औं संस्करणको फिफा विश्वकपमा विजेता अर्जेन्टिनालाई बधाई दिएका छन् । उनले सामाजिक सञ्जालमार्फत तेस्रोपटक विश्वकप उपाधि जितेको अर्जेन्टिना र कप्तान लियोनल मेस्सीलाई बधाई दिएका हुन् ।

पेलेले अर्जेन्टिनाको जितमा दिवंगत भइसकेका डिएगो म्याराडोना हाँसिरहेको हुनसक्ने पनि बताएका छन् । ‘आज फुटबलले सधैंझैँ कथा भन्ने क्रमलाई निरन्तरता दिएको छ’, उपचाररत पेलेले इन्स्टाग्राममा लेखेका छन्, ‘मेस्सीले पहिलो विश्वकप जितेका छन्, जसका लागि उनी योग्य थिए । बधाई छ अर्जेन्टिना, डिएगो (म्याराडोना) हाँसिरहेका छन् ।’

अर्जेन्टिनालाई सन् १९८६ मा च्याम्पियन बनाउन म्याराडोनाको भूमिका अहम् थियो । विश्व फुटबलमा म्यारोडोना र पेलेमध्ये को सर्वोत्कृष्ट भन्ने विवाद हाल पनि छ । म्याराडोनाको २५ नोभेम्बर २०२० मा मृत्यु भएको थियो ।