मंसिर ४ गते हुने प्रतिनिधीसभा र प्रदेशसभाको निर्वाचनका लागी प्रत्यक्ष तर्फको उमेदवारी दर्ताको कार्यक्रम सम्पन्न भएको छ । उमेदवारी दर्ताका क्रममा विभिन्न क्षेत्रमा केहि रोचक दृश्यहरु पनि देखिएका छन् ।

कोहि पाएको टिकट पनि नलिने, कोहिले टिकटका लागी दिलोज्यानले लाग्दा पनि नपाउने त कोही टिकट नपाए पछि स्वतन्त्र उमेदवारी दिने देखी पाएको टिकट छोडेर स्वतन्त्र उमेदवारी दिनेहरु सम्म पनि देखिए । टिकटको चर्चाले उमेदवारी दिने दिनको माहोल निकै गर्माएको थियो ।

नेकपा माओवादी केन्द्रका अध्यक्ष पुष्पकमल दहाल प्रचण्डले चितवन ३ बाट भागेर गोरखा २ मा उमेदवारी दर्ता गराए ।

उमेदवारी दर्ताको दृश्य हेर्दा देशभर माओवादी केन्द्र रक्षात्मक अवस्थामा पुगेको थियो । माओवादी केन्द्रका उमेदवारहरुमा खासै उत्साह संचार भएको देखिएन ।

आफैँ समेत भाग्नु पर्ने अवस्थामा पुगेका प्रचण्डले यस पटकको निर्वाचनमा चाहेका धेरै कुरा पुरा गर्न पाएनन् । प्रचण्डले नेपाल विद्युत प्राधिकरणका कार्यकारी निर्देशक कुलमान घिसिङलाई राजिनामा गराएर काठमाडौँ २ बाट चुनाव लडाउन खोजेका थिए तर उनको प्रयास असफल भयो ।

प्रचण्डले जसरी चितवन ३ मा भरतपुर अस्पतालका अध्यक्षलाई राजिनामा गराएर चुनाव लडाए त्यसै गरी काठमाडाैं२ मा विद्युत प्राधिकरणबाट राजिनामा गराएर कुलमानलाई चुनाव लडाउन खोजेका थिए तर प्रचण्डको प्रस्ताव कुलमानले ठाडै अस्विकार गरेको बताइन्छ ।

कुलमानले आफु सबै नेपाली जनताको साझा मान्छे भएको भन्दै माओवादी केन्द्रको चुनाव चिन्ह हसिया हथौडा लिएर चुनाव लड्न अस्विकार गरेको बताइन्छ ।

कुनै हातलमा पनि हसिया हथौडा लिएर चुनाव नलड्ने बरु स्वतन्त्र उमेदवारी दिन भने तयार रहेको अडान उनले लिए पछि माओवादीको नेतृत्व व्याक भएको थियो ।

अहिले ओनसरी घर्तीलाई उमेदवार बनाएको काठमाडौँ २ बाट प्रचण्डले कुलमानलाई उमेदवार बनाउन खोजेका थिए ।

कुलमानले भने आफु स्वतन्त्र उमेदवार बन्ने र गठबन्धनले सहयोग गर्नु पर्ने प्रस्ताव गरेको बताइन्छ । कुलमानले यस्तो प्रस्ताव गरे पछि प्रचण्डले त्यसो गर्नु भन्दा ओनसरीलाई चुनाव लडाउने निर्णय गरेका थिए ।

कुलमानले माओवादीको चिन्हबाट चुनाव लड्न अस्विकार गरे सँगै कुलमानलाई देखाएर माहोल बनाउने प्रचण्डको प्रयास पुर्ण रुपमा असफल भएको छ ।

स्थानिय तहको निर्वाचनमा बालेनले कमाल गरे पछि प्रचण्डले बालेन भन्दा चर्को सेन्टीमेन्ट ल्याउने गरी काठमाडौँमा उमेदवार उठाउने घोषणा गरेका थिए । उनको त्यस्तो घोषणा पनि ढुस भएको छ ।