बैतडीको सिगास गाउँपालिका ६ थालाकाँडाबाट हेलिकोप्टरमार्फत उद्धार गरेर सुर्खेतको प्रादेशिक अस्पताल पुर्याएकी सुत्केरी महिलाको लामो व्यथाका कारण शिशुको मृ,त्यु भएको छ । डाक्टरले शिशुको गर्भमै मृ,त्यु भएको जानकारी दिएको सुत्केरी महिलाका श्रीमान दिपेन्द्र धामीले जानकारी दिए ।

हवाई उद्धारले सुत्केरीको ज्यान जोगिएको भएपनि शिशुको भने मृ,त्यु भएको बताए । उनले भने ‘लामो व्याथाका कारण शिशुको गर्भमै मृ,त्यु भएको छ । सुत्केरीको पनि गम्भीर अवस्था रहेको र उपचार भइरहेको छ ।’

शनिबारदेखि सुत्केरी व्याथा लागेकी २० बर्षीया बिन्दु धामीको सोमबार दिउँसो हवाइ उद्धार गरेर कर्णाली प्रादेशिक अस्पताल सुर्खेत पुर्याइएको थियो ।

महिला बालबालिका तथा जेष्ठ नागरिक मन्त्रालयको सुत्केरी हवाई उद्धार कार्यक्रमले सुत्केरी महिलाको ज्यान जोगिएको भएपनि शिशुको भने मृ,त्यु भएको छ । जिल्ला सदरमुकामबाट निकै टाढा रहेको सिगासमा यातायातको सहज पहुँच नहुँदा सुत्केरी महिलाहरुले समस्या भोग्दै आएका छन् । यद्यपि जिल्ला अस्पताल बैतडीमा जटीलतायुक्त प्रसुतीका लागि शल्यक्रिया सेवा भएपनि यातायातको अभावमा पहुँच पुग्न सकेको छैन् ।

सिगासमा कच्ची सडक भएपनि बर्षातको समयमा ती सडकहरु बन्द हुने गरेका छन् । बर्षातको समयमा सडक बन्द हुँदा आकस्मिक बिरामीहरुलाई अस्पताल पुर्याउन निकै समस्या हुने गरेको छ ।