काठमाडौं । जापानमा रहेको आकी नेपालले काठमाडौंको बूढानीलकण्ठ नगरपालिका ४ मा रहेको मदन आश्रित आदर्श आधारभूत विद्यालयका विद्यार्थीलाई झोला वितरण गरेको छ ।
२०७९ साल असार २२ गते विद्यालयमा आयोजित एक कार्यक्रममा १ सय ६० जना विद्यार्थीलाई झोला वितरण गरिएको रोजित श्रेष्ठले जनाएका छन् । जापानमा रहेका काठमाडौं ताहाचल निवासी रश्मिन कबेले ती झोला उपलब्ध गराएका थिए । श्रेष्ठले कबेले पठाएका झोला वितरण गरिएको बताए । आगामी दिनमा पनि विद्यार्थीको पढाइलाई सहयोग पुग्ने गरी अन्य प्रकारका सामग्री उपलब्ध गराउँदै जाने श्रेष्ठको भनाई छ । स्थानीय प्रेम प्रसाइको समेत सक्रियतामा यो विद्यालयमा झोला वितरण गरिएको हो । २ सय ३० विद्यार्थी रहेको यो विद्यालय २०५८ साल वैशाख ३ गते स्थापना भएको विद्यालयका संस्थापक प्रधानाध्यापक राजाराम भण्डारीले जनाए । प्रधानाध्यापक भण्डारीले विद्यार्थीका लागि सहयोग उपलब्ध गराएकामा आकी नेपालसहित नेपालमा बसेर संयोजन गर्नेहरुप्रति धन्यवाद व्यक्त गरेका छन् । बाँकी विद्यार्थीलाई पनि चाँडै नै अन्य सामग्री दिने तयारी भइरहेको श्रेष्ठले बताए । झोला वितरण गर्दै विनिती श्रेष्ठले यसको प्रभावकारिता हेरेर थप सहयोग बढाउने जनाइन् । उनले कहाँका विद्यार्थीलाई के समस्या छ त्यसको पहिचान गर्ने र विस्तारै त्यसै अनुसारको सहयोग गरिँदै जाने बताइन् । आकी नेपालले शिक्षा, स्वास्थ्यलगायतका विभिन्न क्षेत्रमा आफ्नो तर्फबाट सहयोग गर्दै आएको छ ।