मंकीपक्सको आशंका गरी टेकु अस्पतालमा भर्ना गरिएका एक युवकमा कुष्ठरोग भएको पाइएको छ ।

अस्पतालले हिजो र आज गरेको प्रयोगशाला परीक्षण र ड्रमाटोलोजिष्टहरुको टीमले गरेको अनुसन्धानले सं,क्रमण मंकीपक्सको नभई कुष्ठरोग भएको पत्ता लागेको हो ।

मंकीपक्सको जस्तै लक्षण देखिएका २६ वर्षीय युवक हिजो दुबईबाट नेपाल आएका थिए । त्रिभुवन अन्तराष्ट्रिय विमानस्थलस्थित हेल्थ डेस्कका स्वास्थ्यकर्मीले उनलाई मंकीपक्सको आशंकामा सिधै टेकु अस्पताल रिफर गरेका थिए ।

‘सुरुमा मंकीपक्स हो कि जस्तो देखिएको थियो । तर परीक्षणबाट कुष्ठरोग भएको पुष्ठि भएको छ । त्यसको जानकारी स्वास्थ्य मन्त्रालयलाई गराईसकिएको छ, अस्पताल स्रोतले भन्यो । मन्त्रालयले केही बेरमा त्यसबारेमा रिपोर्ट सार्वजनिक गर्ने बुझिएको छ ।

स्वास्थ्य मन्त्रालयका अनुसार नेपालमा आजसम्म मंकीपक्सको कुनै पनि सं,क्रमण पुष्टि भएको छैन। अहिलेसम्म विश्वका २९ वटा देशमा मंकीपक्स देखा परेको र १ हजारभन्दा बढी सं,क्रमित भएका छन् ।

मंकीपक्सको संक्रमण देखिएपछि शरीरमा फोका उठ्ने, बिमिरा आउने, ज्वरो आउने र ग्रन्थीहरु सुन्निनेजस्ता समस्या देखिन सक्छन् । मंकीपक्स भएको ३–४ हप्तासम्म लक्षण रहने र मानिसबाट मानिसमा सर्नेसक्ने सम्भावना रहन्छ ।