एजेन्सी। लागूऔषध सेवन गरेको आरोपमा शक्ति कपूरका छोरा र श्रद्धा कपूरका भाइ सिद्धान्त कपूर पक्राउ परेका छन् । सिद्धान्तलाई बेंगलुरुको एउटा रेभ पार्टीमा प्रहरीले छापा मारेर लागूऔषध प्रयोग गरेको आरोपमा पक्राउ गरेको हो । एएनआईका अनुसार उनी लागुऔषध सेवन गर्ने कथित ६ जनामध्ये एक हुन् । उनको ड्रग्स परीक्षण पनि पोजिटिभ आएको छ।
भारतीय समाचार स्रोतका अनुसार प्रहरीले सूचना पाएपछि एमजी रोडस्थित होटलमा छापा मारेको थियो । छापापश्चात प्रहरीले ३५ जनाको नमुना लागूऔषध परीक्षणका लागि पठाएको थियो । सिद्धान्त कपुर ६ मध्ये एक हुन्, जसको पोजिटिभ नतिजा आएको हो। उनलाई अहिले उल्सूर पुलिस स्टेशनमा ल्याइएको छ ।
यस्तो घटना बाहिर आएपछि सिद्धान्तका बुवा शक्तिले आफूलाई यो कुरा पत्याउन गाह्रो भएको र यो सम्भव नै नभएको बताएका छन् ।
सिद्धान्त र अन्यले पार्टीमा लागूऔषध सेवन गरे वा बाहिर सेवन गरेर होटेलमा पुगे भन्ने कुरा भने अझै स्पष्ट हुन सकेको छैन ।
को हुन् सिद्धान्त कपूर ?
सिद्धान्त शक्ति कपूरका छोरा र श्रद्धा कपूरका भाइसँगै एक अभिनेता हुन् । उनले २०२० मा आएको वेब सिरिज ‘भौकालमा’ चिन्टु देढाको भूमिका निभाएका थिए । यसबाहेक उनले सुटआउट एट वडाला, अग्ली, हसिना पार्कर, चेहरेलगायतका चलचित्रमा पनि अभिनय गरेका छन् । भागम भाग, चुप चुप के, भूल भूलैया, ढोल जस्ता चलचित्रमा पनि उनलाई सहायक निर्देशकका रुपमा देख्न सकिन्छ ।