काठमाडौँ । प्रतिनिधिसभाको बैठक आज बस्ने भएको छ ।
आजको बैठकमा बहुचर्चित र विवादित अमेरिकी सहायता परियोजना (एमसीसी) टेबल हुन्छ कि हुँदैन भन्ने धेरैको चासो छ । सरकारको नेतृत्व गरेको दल नेपाली काँग्रेसले एमसीसी आजै टेबुल गर्नुपर्ने प्रस्ताव गरेको छ ।

मङ्गलवार बसेको नेपाली काँग्रेस केन्द्रीय कार्यसम्पादन समितिको बैठकले एमसीसी पारित गर्ने निर्णय गरेसँगै आजको संसद्मा उक्त सम्झौता टेबल हुन सक्ने बुझिएको छ तर, संसद् सचिवालयले जारी गरेको सम्भावित कार्यसूचीमा एमसीसीको विषय राखिएको छैन ।

सत्ता घटक माओवादी केन्द्र र एकीकृत समाजवादीले सदनबाहिर एमसिसीको विरोध गरिरहे पनि दबाबमा छन् ।

सभामुख अग्नि सापकोटाले आज दिउँसो १ः०० बजे बस्ने प्रतिनिधिसभा बैठकको कार्यसूची तय गर्न बिहान साढे ११ः०० बजे कार्य व्यवस्था परामर्श समितिको बैठक बोलाउनुभएको छ ।

प्रमुख प्रतिपक्षी दल नेकपा एमालेले आज बस्ने प्रतिनिधिसभाको बैठकमा अवरोध गर्ने जनाएको छ ।

एमालेले आफूले पदमुक्त गरेका १४ जना सांसदको कारबाहीको सूचना जारी नगरेर सभामुख सापकोटाले एमाले विभाजनमा भूमिका खेलेको भन्दै एमालेले निरन्तर संसद् बैठकमा अवरोध गर्दै आएको छ ।