सुरेन्द्र सिलवाल
भक्तपुर । भक्तपुरकी प्रमुख जिल्ला अधिकारी (सिडिओ) रुद्रादेवी शर्माले मास्क नलगाई हिँड्नेलाई ठाउँको ठाउँ कारबाही गरिने बताएकी छिन् ।
उनले कोरोनाको संक्रमण बढ्दै गएकाले त्यसतर्फ सबै आफैं सचेत हुनुपर्नेमा जोड दिएकी छिन् । प्रशासनले सूचना जारी गर्दा, जानकारीमूलक सन्देश प्रवाह गर्दा पनि सर्वसाधारणले हेलचेक्रयाई गर्दै गरेको प्रति उनी चिन्तित छिन् । ‘सबै आफैं सचेत भएर कोरोना नियन्त्रणमा लाग्नुपर्ने हो तर पनि गम्भीरता देखिएको छैन’ उनले भनिन् ‘मास्क नलगाउनेलाई ठाउँको ठाउँ कारबाही हुन्छ ।’ उनले सरकारले जारी गरेका सुरक्षा मापदण्ड पालना गर्न पनि अनुरोध गरेकी छिन् । उनले खोपको अभाव हुन नदिने प्रतिबद्धता जनाएकी छिन् । उनले सेवाग्राहीलाई स्वास्थ्यका मापदण्ड पालना गर्दै सेवा लिन पनि आग्रह गरेकी छिन् । उनले कोरोना नियन्त्रण र रोकथाम गर्न सबै क्षेत्र र समुदायलाई आ–आफ्नो ठाउँबाट सहयोग गर्न पनि अनुरोध गरेकी छिन् । उनले कोरोनाको रोकथाममा लाग्ने, सामाजिक अभियान चलाउने, ठाउँठाउँमा मास्क र सेनिटाइजर बाँड्ने व्यक्ति र समूहप्रति हार्दिक आभारसमेत व्यक्त गरेकी छिन् ।