काठमाडौं । शेषकान्त फाउण्डेशनले धादिङको धुनीवेशी नगरपालिकालाई बुधवार कोरोना संक्रमणबाट बचाउने स्वास्थ्य सामग्री सहयोग गरेको छ ।
फाउण्डेशनका उपाध्यक्ष तथा नेपाली कांग्रेस धादिङका कोषाध्यक्ष बाबुकृष्ण सापकोटाले फाउण्डेशनले सामाजिक उत्तरदायित्व निर्वाह गर्दै ती सामग्री वितरण गरिएको जनाए । फ्युचर अफ नेपालको आर्थिक सहयोग र लाजिम्पाट काठमाडौंमा रहेको कोकिना मिठो छ को सहकार्यमा स्वास्थ्य सामग्री उपलब्ध गराइएको संस्थाले जनाएको छ । फाउण्डेशनका अध्यक्ष विश्वेश्वरप्रसाद ढकालले नगरपालिकामा नै पुगेर नगर प्रमुख वालकृष्ण आचार्यलाई ती सामग्री हस्तान्तरण गरेका हुन् ।
फाउण्डेशनले मेडिकल मास्क ५० प्याकेट, पीपीई एक सय पीस, अक्सिमिटर ५० पीस, थर्मोमिटर ५० पीस, कन्सन्टेटर ३ थानका साथै ग्लोव्सलगायतका सामग्री प्रदान गरिएको फाउण्डेशनका उपाध्यक्ष सापकोटाले जनाएका छन् । सापकोटाले आवश्यकता अनुसार अन्य स्थानीय तहमा पनि उपलब्ध गराउने स्पष्ट पारेका छन् । ‘यो असहज अवस्थामा आफ्नो तर्फबाट केही सहयोग गरौं भनेर यो अभियान चलायौं’ उनले भने ‘कोरोना भाइरस नियन्त्रण र रोकथामका लागि सबैले आफ्नो ठाउँबाट जिम्मेवार भएर योगदान गर्नुपर्ने बेला भएको छ ।’