काठमाडौँ । कोभिड–१९ संक्रमण नियन्त्रण गर्न सरकारले आजदेखि लागू हुने गरी जारी गरेको निषेधाज्ञाका बेला पनि आन्तरिक र अन्तर्राष्ट्रिय उडान भने हुने छन् । तर जहाज चढ्न र ओर्लिने बित्तिकै गन्तव्यमा पुग्न भने सजिलो छैन । यात्रुहरुलाई आन्तरिक उडानतर्फ जहाजमा पहिले जस्तो फेस सिल्डसहित मास्क, सेनिटाइजर अनिवार्य गरिएको छ । प्रत्येक उडानपछि जहाज तथा ब्यागेजलाई निसंक्रमित गर्नुपर्ने छ, चेक–इन बोर्डिङ, ब्यागेज क्लेम, प्रतीक्षालायमा हुने भीडभाडमा भने रोक लगाइएको छ ।
कुनै पनि विदेशीले सजिलै नेपालबाट तेस्रो मुलुक जान पाउने छैनन् । भारतीय वा अन्य मुलुकबाट नेपाल आएकाले अर्को (तेस्रो) मुलुक प्रस्थानको अनुमति नपाउने अध्यागमन विभागका निर्देशक झकनाथ ढकालले बताएका छन् । मन्त्रिपरिषद्ले सोमबार गरेको यो निर्णयअघि नै नेपाल आइसकेका विदेशी नागरिकले त्रिभुवन अन्तर्राष्ट्रिय विमानस्थल वा स्थलमार्गबाट बाहिरिन चाहे सरकार र मातहतका निकायले रोक्न नपाउने उनले बताएका छन् ।
त्रिभुवन अन्तर्राष्ट्रिय विमानस्थलमा भुटानलगायत केही मुलुकका लागि ट्रान्जिट विन्दु पनि भएकोले विभागले ट्रान्जिटमा रोक लगाइएको सूचना जारी गरेको छ । चिनियाँ र भारतीय बाहेक अन्य विदेशीलाई स्थलमार्गबाट नेपाल प्रवेशमा रोक लगाइएको छ । स्थलमार्गबाट नेपाल आउनुपर्ने भारतीय नागरिकले यात्रा गर्नुअघि स्वाब संकलन भएको ७२ घण्टाभित्रको कोभिड–१९ नेगेटिभ रिपोर्ट देखाउनुपर्ने र त्यस्तै १० दिन अनिवार्य होटल क्वारेन्टाइनमा बस्नुपर्ने छ । स्थानीय प्रशासनलाई यी दुई विषयको प्रमाण देखाएका आधारमा नेपालभित्र भारतीय नागरिकले सडकमार्गबाट प्रवेश पाउनेछन् । सडकमार्ग हुँदै आउने चिनियाँ नागरिकले पनि ७२ घण्टाभित्रको पीसीआर नेगेटिभ रिपोर्ट र नेपाली होटलमा १० दिन बस्ने बुकिङ अनिवार्य देखाउनुपर्नेछ ।