काठमाडौं । विदेशबाट नेपाल आइ त्रिभुवन अन्तर्राष्ट्रिय विमानस्थल प्रयोग गरी तेस्रो मुलुक जाने क्रम बढेपछि अध्यागमन विभागले त्रिभुवन अन्तर्राष्ट्रिय विमानस्थल प्रयोग गरी तेस्रो मुलुक जान प्रतिबन्ध लगाएको छ ।
विभागका सूचना अधिकारी तथा निर्देशक झंकनाथ खनालले एक सूचना जारी गर्दै बैशाख १५ गते राती १२ बजेदेखि प्रतिबन्ध लागू हुने जानकारी दिएका छन् ।
विभागका अनुसार त्रिभुवन अन्तर्राष्ट्रिय विमानस्थलबाट तेस्रो मुलुक जाने उद्देश्यले अर्को कुनै देशबाट नेपाल आउन र यहाँबाट तेस्रो मुलुक जान रोक लगाइएको हो । नेपाल नै अन्तिम गन्तव्य बनाइ विदेशबाट फर्किन तथा नेपालमा नै रहेकाहरुलाई विदेश जान भने पहिलेकै नियम कायम रहेको विभागले जनाएको छ ।
पछिल्लो समय नेपाललाई ट्रान्जिट बनाइ तेस्रो मुलुक जाने भारतीयको संख्या ह्वात्तै बढेको थियो । भारतमा कोरोना संक्रमण अत्याधिक बढेपछि विश्वका कैयौं देशले भारतसँग आवागमन बन्द गरेका थिए । तर, ती देशहरुले नेपालसँगको आवागमन भने बन्द गरेका थिएनन् । यही व्यवस्थाको फाइदा उठाउँदै तेस्रो मुलुक जान भारतीयहरु नेपाल आउने गरेका थिए ।