प्यूठान । खानेपानी मन्त्रालयले प्युठानको प्रसिद्ध धार्मिकस्थल स्वर्गद्धारीमा रहेको खानेपानीको समस्या समाधानका लागि माडी नदीको पानी लिफ्टीङ गर्ने निर्णय गरेको छ ।
मन्त्रालयले बिहिबार त्यस्तो निर्णय गरेको हो । त्यसअघि स्वर्गद्धारीमा रहेको खानेपानी समस्या समाधानसम्वन्धमा खानेपानी मन्त्री मणि थापा, मन्त्रालयका सचिव माधव वेलवासे, विभाग र आयोजनाका प्रमुखहरुसहितको टोलीले स्वर्गद्धारीमा पुगेर छलफल गरेका थिए । स्वर्गद्वारी नगरपालिकाका जनप्रतिनिधी, स्वर्गद्धारी आश्रमका प्रतिनिधीहरुसँगको छलफलपछि मन्त्री थापाले लिफ्टिङ गरेर स्वर्गद्धारीमा खानेपानी पु¥याउने निर्णय गरेका हुन् ।
मन्त्रालयले स्वर्गद्धारीको खानेपानी समस्या समाधानका लागि यही बर्ष डिपिआर सक्ने समेत निर्णय गरेको छ । मन्त्री थापाले आगामी आर्थिक बर्ष नै बजेटको व्यवस्था गरि स्वर्गद्धारीमा रहेको खानेपानी समस्यालाई सधैँको लागि समाधान गर्ने प्रतिवद्धता जनाएका हुन् ।
स्वर्गद्धारीमा दैनिक तीन सयको हाराहारीमा धार्मिक पर्यटक पुग्नेगर्छन् । स्वर्गद्धारी आश्रममा करिब चार सय परिवारको बसोबास छ । स्वर्गद्धारी आश्रमले त्यहाँ ४ सय ६० वटा भन्दा बढी गाई पाल्दै आएको छ ।
पानीको अभावले मन्दीरको सरसफाईमा समेत समस्या पर्दै आएको थियो । यस्तै भत्तजनलाई खानेपानीको समस्या, त्यहाँ पालिएका गाईलाई समेत खानेपानीको अभाव हुँदै आएको थियो । यहीँ समस्या समाधानका लागि मन्त्री थापाले मन्त्रीस्तरिय निर्णयबाट माडी नदीको पानी लिफ्ट गरेर स्वर्गद्धारीको खानेपानी समस्या समाधान गर्ने निर्णय गरेका हुन् ।