काठमाडौं । प्रधानमन्त्री केपी शर्मा ओलीले जनयुद्धमा पुष्पकमल दाहालले प्रचण्डले कार्यकर्तालाई जंगलमा राखेर आफू दिल्ली बसेको बताएका छन ।
बिहीबार नेपाल ट्रेड युनियन महासंघको भेलामा बोल्दै प्रधानमन्त्री ओलीले प्रचण्डप्रति लक्षित गर्दै भने ‘उहाँ जंगल बसेको होइन । त्यसबेला दिल्ली हुनुहुन्थ्यो हामीलाई थाहा छ,’ प्रधानमन्त्री ओलीले भने, ‘कार्यकर्ता जंगल बसाउनुभयो । तेलले जुल्फी कोरेर उहाँ दिल्ली बस्नुहुन्थ्यो ।’
प्रधानमन्त्री ओलीले प्रचण्डलाई ०७४ सालको चुनावमा चितवनमा आफूहरूले जिताएको बताएका छन् ।
‘०७४ मा चितवनमा उहाँलाई हामीले जिताएको हो । ठूला सभा गरेर । जनतालाई लौन भोट हालिदिनुस् भनेर आग्रह र अनुरोध गरेर जिताएको हो, ओलीले भने, ०७० सालमा त बत्ती निभाएर, बाकस साटेर । त्यसअघि कीर्तिपुरमा हारेको । रोल्पा, सिरहा, कीर्तिपुर हुँदै चितवन जानुभयो अब कता जाने हो ? जंगल जाने होइन।’
‘प्रचण्डले सूर्य चिन्हबाट एकपटक चुनाव लड्नु भयो ? कहिलेबाट तपाईंको भो सूर्य चिन्ह ? ,’ उनले प्रश्न गरे, ‘पार्टी छोडेपछि सूर्य चिन्ह ? दशा लागेपछि के लाग्छ।’
प्रधानमन्त्री ओलीले आफूविरूद्ध मुद्दाहरू दर्ता भइरहेकोले कानुन पढेकाहरूले काम पाइरहेको बताए । विगतमा आफ्नो सरकार प्रचण्ड, माधव नेपाल, झलनाथ खनाल र वामदेव गौतमले ढालेको उनले बताएका छन् ।