काठमाडौं । गोरखाको २ को (२) नम्बर क्षेत्रबाट निर्वाचित नेपाली कांग्रेसका प्रदेश सांसद प्रकाशचन्द्र दवाडीले राजनीतिलाई समाजसेवामा परिणत गरेका छन् ।
उनी प्रायजसो गाउँमा नै बस्छन् । दिनहुँ जनताको सेवामा घरदैलो घुम्न पाएमात्र उनलाई राजनीतिमा लागेजस्तो लाग्छ । ‘मेरो राजनीतिक जनताको टेवाको लागि, मेरो राजनीति तपाइहरुकै सेवाको लागि’ भन्ने मुख्य नारा बनाएका उनले त्यसलाई सार्थक बनाउँदै लगेका छन् । उनले गोरखाको बारपाक सुलीकोट गाउँपालिका वडा नम्वर ४ गुरुङ गाउँको एक आमा समूहलाई आर्थिक सहयोग प्रदान गरेका छन् । स्थानीय सिर्जनशील तमु समाज आमा समूहलाई गाउँमा सम्पन्न एक समारोहका बीच सांसद दवाडीले २५ हजार रुपैयाँ प्रदान गरेका हुन् ।
समूहले निर्माण गर्दै गरेको सामुदायिक भवनका लागि आर्थिक अभाव भएकाले सहयोग माग भएपछि सो रकम सहयोग गरेको सांसद दवाडीले बताएका छन् । सांसद दवाडीले सांसदका लागि आउने सबै सुविधा आफ्नै निर्वाचन क्षेत्रमा विभिन्न सामाजिक काममा प्रयोग गर्दै आएका छन् ।