काठमाडौं । बिहीबार राति आईसीसी क्रिकेट विश्वकप लिग–२ मा ओमानसँग १३ रनले पराजित भएको छ ।
अमेरिकामा टेक्ससको ह्युस्टनस्थित मुसा क्रिकेट मैदानमा ओमानका कप्तान जिशन मक्सुदले टस जितेर ब्याटिङ गर्ने निर्णय गरेका थिए । मक्सुदले शतक बनाएपछि ओमानले निर्धारित ५० ओभरमा ८ विकेट गुमाएर २११ रन बनाएको थियो । २१२ रनको लक्ष्य पछ्याएको नेपालले ४९.४ ओभरमा सबै विकेट गुमाएर १९८ रनमात्र बनाउन सक्यो ।
नेपालका आरिफ शेखले ६६ रन बनाए पनि अन्यले अपेक्षाकृत प्रदर्शन गर्न नसक्दा हार टर्न सकेन । देब खनालले ३४, रोहितकुमार पौडेलले २०, दीपेन्द्रसिंह ऐरीले १६, विनोद भण्डारीले १४, सोमपाल कामीले १३ र डेब्यू गरेका सुनिल धमलाले १२ रन बनाए । करण केसी ८ र सन्दीप लामिछाने २ रन बनाएर पवेलियन फर्किए । ओपनर सुवास खकुरेल ३ रन बनाएर आउट भएका थिए ।
ओमानका मक्सुद र खवार अलीले समान तीन विकेट लिए । विलाल खानले दुई विकेट लिँदा आयान खानको नाममा एक विकेट रह्यो ।
त्यसअघि पहिले ब्याटिङ गरेको ओमान एक समय १०० रनको योगफल वरिपरी सिमित हुने स्थितिमा थियो । तर, कप्तान मक्सुदले उत्कृष्ट इनिङ्स खेलेपछि ओमान सम्मानजनक स्कोर खडा गर्न सफल भएको हो । ओमान एक समय ८६÷५ को स्थितिमा थियो । ओपनर कश्यप प्रजापति शून्यमा पवेलियन फर्किदा जतिन्दर सिंह ११ रनमा आउट भएका थिए । शोएब खान २७ र मोहम्मद नादीम एक रन बनाएर आउट हुँदा ओमान ५५–४ को स्थितिमा थियो ।
नेपालले अब दोस्रो खेल अमेरिकाविरुद्ध शनिबार राति प्रतिस्पर्धा गर्नेछ ।