काठमाडौं । ‘उठाउ माटो लगाउ टिको देशको नाउँमा, सुनको लंका लुकेको हुन्छ तन्देरी पाउमा’ यो स्वदेश गानको हरफहरु जस्तै आफ्नो युवा पाखुरी आफ्नै देशका बारीहरुमा बजारेर सुन फलाउनका लागि लागी परिरहेका थोरै कर्मठ नेपालीहरुमध्यको एक नाम हो युवा उद्यमी बिष्णु वास्तोला ।
उनले नेपालमा केही गर्न सकिदैन भनेर निरास भएर विदेश पलायन हुने गरेका युवाहरुलाई आफ्नो लागि मात्र होइन चाह्यो भने अरुका लागि पनि रोजगारीको अवसर सृजना गर्न सकिन्छ भनेर गतिलो उदाहरणको झापड पनि हानेका छन् । वाइनरी स्टडीज विषयमा नै अध्ययन गरेर लामो समयसम्म किवीजस्तो महंगो फलको वाइनमाथिको सम्भावना अध्ययन गर्नुका साथै आफै पनि केही उद्योगहरुमा कार्य गरी अनुभव सँगालेर धनकुटा जिल्लाको राजारानीलाई रोजेर विदेशी वाइन बजारलाई उछिन्ने सुकिलो सपना बोकेर लागि परेका बास्तोला र उनका साथीहरुले झण्डै साढे तीन सयभन्दा बढीलाई रोजगार दिइरहेका छन् । यो क्षेत्रमा आफू सफल हुनुको पछाडि उनी आफ्नो दक्षता र अनुभवलाई दिन्छन् । हुन पनि उनीसँग अन्तराष्ट्रिय स्तरमा आफैले काम गरेको अनुभव भएकोले पनि यो व्यवसाय सञ्चालन गर्दा अरु सञ्चालकले जस्तो दक्ष जनशक्तिको अभावको समस्या भोग्नु परेको छैन ।

विदेशी वाइनहरुले वजार सर्लक्कै निलेको र विदेशी वाइन पिउँदा नै आफूलाई ठूलो सम्झने नेपालीहरु वाइन पारखीहरुको माझ स्वदेशी उत्पादनले प्रतिस्पर्धा गर्न आँट गर्नु चानचुने होइन । तर पनि हिम्मत नहारी हाम्रो बजारमा राम्रो कुरा दिन लागिपरेका छन् । उनको यही उत्साह र उमंंगलाई मर्न नदिन स्थानीय सरकारले पनि स्थानीय स्तरमा किवी खेती लगाउन प्रेरित गरिरहेको छ भने सरकारले नै किवीका विरुवा स्थानीय किसानलाई बाँडेर यो खेतीका लागि प्रोेत्साहन गरिरहेको कुरा बताउँछन् ।
रातो किवीबाट रेड वाइन र हरियो किवीबाट ह्वाइट वाइन गरी दुई किसिमका वाइन वजारमा ल्याइरहेको एभरेष्ट वाइनरी प्रा.लि फरक स्वादमा भएकोेले पनि विस्तारै विस्तारै नेपालीहरुको प्रिय वाइन बन्ने र सबैको रोजाइमा पर्ने कुरामा आशावादी छ । एभरेष्ट वाइनरी प्रा.लि.मा वास्तोला नै कार्यकारी निर्देशक रहेका छन् ।
उनी यो क्षेत्रमा हचुवाको भरमा हाम फालेका पनि होइनन् । भारतको नासिकको करिब तीन महिनाको ट्रेनिङ पश्चात जापानमा नब्बे दिनको स्पेशल तालिममा प्लान्टेशनदेखि हार्भेष्टिङसम्म र प्रोसेसिङदेखि बोटलिङसम्मकै प्रशिक्षण लिएका थिए । त्यसपछि चीनका उद्योगहरुमा करिब तीन महिनाको बसाइ र सिकाइका साथै युरोपका केही देशहरुमा भएका वाइन उद्योगहरुको अध्ययन पश्चात आफूलाई निखारेर यो व्यापारिक रणमैदानमा उत्रिएका हुन् ।
पूर्वी पहाडी जिल्लाहरु इलाम, पाँचथर, भोजपुर, धनकुटा आदि जिल्लाबाट वाइन कच्चा पदार्थ किवी आउने गरेको र ती किवी कृषकको उचित वजार प्रबन्धनमा पनि टेवा दिइरहेको फ्याक्ट्रीले सोचेअनुरुप आफ्नो व्यवसाय फैल्याउँदै गएमा हजारौ नेपाली युवाहरुलाई रोजगारी सृजना गर्नेमात्रै होइन आफ्नै देशमा नै केही गर्नुपर्छ भन्ने जिउँदोजाग्दो उदाहरण पनि बन्नेछ । यसले प्रत्यक्ष र अप्रत्यक्ष दुवै रुपमा देशको अर्थतन्त्रको विकासमा टेवा मात्रै खेलेको छैन अपितु सयौं युवाहरुलाई विदेशी भूमीमा गएर आफ्नो भविष्य बर्वाद पार्नबाट पनि जोगाएको छ । नेपाली माटो सुहाउँदो नेपाली स्वादको वाइन नेपालीहरुको आफ्नो वाइन बनोस् र यो नविन प्रयोगले नेपालमात्र होइन सारा विश्वमा आफ्नो बजार फैल्याउन सकोस अर्थ सवाल साप्ताहिकको करोडौ मुरी शुभकामना ।