बीबीसी। दक्षिण अफ्रिकामा कोरोनाभाइरसको सङ्क्रमणमा तीव्र रूपमा वृद्धि भएको छ। सोमवारयतामात्रै देशभरि सङ्क्रमितको सङख्या दोबरले बढेको हो। स्वास्थ्य अधिकारीहरूले कोरोनाभाइरसको नयाँ भेरिअन्ट ओमिक्रोनले सङ्क्रमण यसरी तीव्र रूपमा वृद्धि गरेको हुनसक्ने बताएका छन्।
यद्यपि त्यसकै कारण कति भन्ने स्पष्ट चाहिँ छैन। विगत २४ घन्टामा मात्रै आठ हजार पाँच सय नयाँ सङक्रमितको सङ्ख्या दर्ता भएको छ। अत्यधिक उत्परिवर्तित भनिएको यो नयाँ भेरिअन्ट सुरुमा दक्षिण अफ्रिकामा पत्ता लागेको गत साता घोषणा गरिएको थियो।
अन्य देशमा देखिने क्रम जारी
अमेरिकामा पनि दक्षिण अफ्रिकाबाट फर्किएका एकजनामा ओमिक्रोनको पहिलो सङ्क्रमण देखिएको छ। ओमिक्रोन कति सङ्क्रामक छ र अहिले उपलब्ध खोप त्यसका लागि कति प्रभावकारी छ जस्ता थुप्रै विषयबारे अध्ययन भइरहेको छ।
नाइजेरियन सेन्टर फर डिजिज कन्ट्रोलले गत साता दक्षिण अफ्रिकाबाट नाइजेरिया आएका यात्रुहरूमा उक्त भेरिअन्ट पत्ता लागेको जनाएको छ। यो साताको सुरुमा, क्यानडा सरकारले नाइजेरियाबाट आएका दुई यात्रुमा ओमिक्रोन भेरिअन्ट पत्ता लागेको जनाएको थियो। विश्व स्वास्थ्य सङ्गठनले गत साता यो नयाँ भेरिअन्टलाई “भेरिअन्ट अफ कन्सर्न” का रूपमा वर्गीकरण गरेको थियो।

दक्षिण अफ्रिकामा नयाँ भेरिअन्ट पहिलोपटक पत्ता लागेको घोषणा भएयता थुप्रै पश्चिमा देशहरूले दक्षिण अफ्रिकी देशहरूमाथि प्रतिबन्ध लगाउँदै आएका छन्। दक्षिण अफ्रिकाका राष्ट्रपति सिरिल रामापोसाले त्यस्तो प्रतिबन्ध विज्ञानका आधारमा नभइ विभेदपूर्ण ढङ्गबाट लगाइएको र त्यो प्रतिउत्पादक हुने बताएका थिए।
उनले सबै देशहरूलाई यात्रा प्रतिबन्धको निर्णय उल्ट्याउन पुनस् एकपटक आह्वान गरेका छन्। नाइजेरियाका राष्ट्रपति मोहम्मदु बुहारीसँऊ अबुजास्थित राष्ट्रपति कार्यालयमा संयुक्त प्रेस सम्मेलनमा बोल्दै रामापोसाले यस्तो आह्वान गरेका हुन्।
पूर्ण रुपमा प्रतिबन्ध लगाइँदा त्यसले दीर्घकालसम्मका लागि आर्थिक क्षति पुर्याउने भन्दै त्यसविरुद्ध क्षेत्रीय नेताहरू एकताबद्ध भएको रामापोसाले बताए। रामापोसा अहिले पश्चिम अफ्रिकाको चारदिने भ्रमणमा छन्।