विराटनगर । सशस्त्र प्रहरीले चलाएको गोली लागेर सुनसरीमा एक जनाको मृत्यु भएपछि अवस्था तनावग्रस्त बनेको छ । आक्रोशित स्थानीयले पूर्व–पश्चिम राजमार्ग अवरुद्ध गर्नुका साथै सशस्त्र प्रहरीको अस्थायी बिटमा आगजनी गरेका छन् ।

बिहीबार राति करिब १ बजे कोशी गाउँपालिका–१ मा तस्करी नियन्त्रणका लागि खटिएको सशस्त्र प्रहरी बलको टोलीले चलाएको गोली लागेर स्थानीय ४५ वर्षीय विजय साहको मृत्यु भएको हो ।

प्रहरीका अनुसार साह भारतीय क्षेत्रबाट चिनी, सर्फ र सुर्ती लगायतका सामग्री ल्याउँदै गर्दा घर नजिकै सशस्त्र प्रहरीले गोली चलाएको थियो । उनलाई दुई राउन्ड गोली लागेको बताइएको छ ।

साहको मृत्युपछि आक्रोशित स्थानीयले पूर्व–पश्चिम राजमार्गको लौकही खण्डमा शव राखेर प्रदर्शन गरेका छन् । प्रदर्शनका कारण राजमार्ग पूर्ण रूपमा अवरुद्ध भएको छ ।

जिल्ला प्रहरी कार्यालय सुनसरीका प्रवक्ता डीएसपी चन्द्र खड्काका अनुसार प्रदर्शनका कारण सवारी साधन सञ्चालन हुन सकेको छैन । मोटरसाइकल बाहेक ठूला सवारी साधनहरू रोकिएका छन् ।

घटनापछि बिहीबार बिहान प्रहरी र स्थानीयबीच वार्ता भए पनि सहमति हुन सकेन । स्थानीयले दोषीमाथि तत्काल कारबाहीको माग गर्दै प्रदर्शन जारी राखेका छन् ।