काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले आजको प्रदर्शन सीमा तोक्ने सरकारी निरङ्कुशतन्त्र विरुद्धको प्रतिकात्मक र शान्तिपूर्ण प्रदर्शन भएको बताएका छन्। सामाजिक सञ्जालमा लेख्दै अध्यक्ष लिङ्देनले यस्तो बताएका हुन्।

उनले आजको प्रदर्शनबाट सरकारलाई नडराउन समेत आग्रह गरेका छन्। उनले लेखेका छन्, ुआज राप्रपाले गर्ने प्रदर्शन भनेको, भन्नलाई प्रजातन्त्र, लोकतन्त्र, गणतन्त्र भन्ने तर जनतालाई यति मात्र बोल यो यो मात्र बोल, अनि यो बाटो मात्र हिँड, यहाँभन्दा एक इन्च पनि यता नआउ भनेर सीमा तोक्ने सरकारी निरङ्कुशतन्त्रको विरुद्धको प्रतिकात्मक र शान्तिपूर्ण प्रदर्शन हो। जहाँ हामी सीमित नेताहरू मात्रै सहभागी हुनेछौँ। वैचारिक दृष्टिकोणले राप्रपा मुलुकको प्रमुख प्रतिपक्ष पार्टी हो, हामी जे गर्छौं भनेरै गर्छौं। सरकारले नडराए हुन्छ।ु

राप्रपाले राजसंस्था पुनर्स्थापना र हिन्दु राज्य घोषणाको माग गर्दै काठमाडौंको बिजुलीबजारमा आज प्रदर्शन गर्दैछ। यसअघि राप्रपाले काठमाडौं, बानेश्वरस्थित निषेधित क्षेत्र तोड्ने निर्णय गरेको थियो। तर गृह मन्त्रालयले समाजमा हिंसा फैलाउने कुनै पनि अराजक, उत्तेजक र गैरकानुनी क्रियाकलापमा संलग्न नहुन चेतावनी जारी गरेको थियो।