काठमाडौं । नेकपा (एमाले) को निशानमा एकसाथ तीनजना मन्त्रीहरु परेका छन् । विभिन्न विवादमा परेका मन्त्रीहरुको राजीनामा माग प्रतिनिधिसभाको बैठकमा बोल्दै एमालेका सांसद रघुजी पन्तले गरेका हुन् ।
उनले स्वास्थ्यमन्त्री मोहनबहादुर बस्नेत, भौतिक पूर्वाधार तथा यातायातमन्त्री प्रकाश ज्वाला र पर्यटनमन्त्री सुदन किराँतीको राजीनामाको माग विहीबार प्रतिनिधिसभाको बैठकमा गरे ।
प्रधानमन्त्रीले सुशासनको भाषण गर्ने तर व्यवहारमा त्यस्तो नदेखिएको आरोप पन्तले लगाए । उनले लुम्बिनी विकास कोषमा ल्हारक्याल लामालाई उपाध्यक्ष नियुक्त गरेर अवैधानिक काम गर्न दिएको र त्यसमा पर्यटनमन्त्री किराँतीको संलग्नता रहेको पन्तले दाबी गरे ।
यसैगरी बालकुमारी घटनामा छानविन समितिले दोषी देखाएका भौतिक पूर्वाधारमन्त्री प्रकाश ज्वाला र अख्तियारमा वयान दिएर आएका स्वास्थ्यमन्त्री मोहनबहादुर बस्नेतलाई सरकारबाट हटाउन उनले माग गरे ।
यसैबीच एमाले निकट विद्यार्थी संगठन अनेरास्वियुले बालकुमारी घटनाको विषयलाई लिएर बिहीबार बिहान देशैभरिका क्याम्पस अगाडि प्रदर्शन गरेको थियो ।बालकुमारी घटनाको प्रतिवेदन सार्वजनिक गर्न खबरदारी तथा प्रदर्शन गरिएको अनेरास्ववियुले जनाएको छ ।
यस क्रममा काठमाडौंको मीन भवन क्याम्पसको गेट अगाडि पुत्ला दहन तथा सिठ्ठी बजाएर विरोध प्रदर्शन गरिएको थियो । बालकुमारी घटनामा दोषी देखिएका भौतिक पूर्वाधारमन्त्री प्रकाश ज्वालालाई बर्खास्त गर्नुपर्ने अनेरास्वियुको माग छ।
छानबिन गर्न गठित समितिले सुरक्षाकर्मीले अत्याधिक बल प्रयोग गरेको निष्कर्ष निकालेको थियो ।