काठमाडौँ । राष्ट्रिय वनक्षेत्रमा साबुन उद्योग निर्माण कार्य गर्न धरानका मेयर हर्क साम्पाङलाई अदालतले रोकेको छ ।

मेयर साम्पाङ र धरान उपमहानगरपालिकाविरुद्ध परेको रिटमा उच्च अदालत विराटनगरले तत्काल काम स्थगन गर्न अन्तरिम आदेश जारी गरेको हो । डिभिजन वन कार्यालयका सुनसरी प्रमुख भीमबहादुर कालिकोटेले दायर गरेको रिटमा उच्च अदालत विराटनगरका न्यायाधीशद्वय रामबहादुर थापा र किरणकुमारी गुप्ताको संयुक्त इजलासले बुधवार अन्तरिम आदेश जारी गरेको हो ।

उच्चको यो आदेशसँगै धरानको वडा नम्बर २० स्थित नमुना टोलमा भइरहेको साबुन उद्योग निर्माण कार्य तत्काल रोक्नु पर्नेछ । डिभिजन वन कार्यालय सुनसरीले वन क्षेत्रको जग्गा भएको र उद्योग खोल्नुपर्ने भए जग्गाको भोगाधिकार प्राप्त गर्ने आवश्यक प्रक्रिया पूरा गरेर मात्र काम अघि बढाउन उपमहानगरपालिकालाई आग्रह गरेको थियो । तर, मेयर साम्पाङले भने उक्त जग्गा वनको नभएको दाबी गर्दै कामलाई निरन्तरता दिएका थिए ।