काठमाडौं । भक्तपुरको ऐतिहासिक एवं सांस्कृतिक पर्यटकीय नगर चाँगुनारायण नगरपालिकालाई ‘योगनगर’ घोषणा गरिएको छ ।
चाँगुनारायण नगरपालिका–७ को विद्युत् तालिम केन्द्र खरीपाटीमा नगरपालिकाद्वारा आयोजित कार्यक्रममा बागमती प्रदेशका मुख्यमन्त्री इन्द्रबहादुर बानियाँले घोषणापत्र वाचन गर्दै चाँगुनारायणलाई ‘योगनगर’ घोषणा गरेका हुन् । मुख्यमन्त्री बानियाले सो अवसरमा ‘चाँगु योग ज्योति सन्देश’ स्मारिकाको विमोचनसमेत गरे ।

बागमती प्रदेशका संस्कृति तथा पर्यटनमन्त्री सुरेश श्रेष्ठले योगनगर घोषणाले चाँगुनारायणको पर्यटन विकासमा नयाँ आयाम थप्ने विश्वास व्यक्त गरे । कार्यक्रममा नगरप्रमुख जीवन खत्रीले चाँगुनारायणका नगरवासीको स्वास्थ्य, सकारात्मक सोच र समृद्धिका लागि नगरपालिकाले योगलाई प्राथमिकतामा राखेको बताए । नगर प्रमुख खत्रीले नगरपालिकाले नगरवासीका लागि नयाँनयाँ कार्यक्रम र योजना सञ्चालन गर्दै गरेको पनि बताएका छन् ।