काठमाडौं । १८ दिनदेखि शिक्षकहरू आन्दोलनरत छन्। उनीहरूले १२ बजेदेखि ३ बजेसम्म माइतीघर नयाँ बानेश्वर सडकमा प्रदर्शन गर्दै आएका छन्। भोलि वैशाख ७ गते आइतबारको प्रदर्शनको समय अघि सारेर ९ बजेदेखि १२ बजेसम्मका लागि तोकिएको नेपाल शिक्षक महासंघका अध्यक्ष लक्ष्मीकिशोर सुवेदीले सामाजिक संजालमार्फत जानकारी दिएका हुन्।

मुख्य सडक नै अवरोध हुँदा १८ दिनदेखि सो क्षेत्रको ट्राफिक प्रभावितसमेत भएको छ। आन्दोलनका समयमा नयाँबानेश्वर अनामनगर, माइतीघर मण्डला, थापाथली धोबीखोला कोरिडोरमा ट्राफिक भार बढी हुने गरेको छ। भोलि वैशाख ७ कै मितिमा राष्ट्रिय प्रजातन्त्र पार्टी राप्रपाले समेत आन्दोलनको घोषणा गरेको छ।