काठमाडौं । संघीय नेपालले आज चौथो राष्ट्रपति पाउने भएको छ । संसद भवनको ल्होत्सेहल परिसरमा हुने निर्वाचनले मुलुकको चौथो राष्ट्रपति चयन गर्ने भएको हो । राष्ट्रपतिय निर्वाचनका लागि सम्पूर्ण तयारी पूरा भएको निर्वाचन आयोगले जनाएको छ ।
संघीय नेपालको पहिलो राष्ट्रपतिमा नेपाली काँग्रेसका डा. रामवरण यादव र दोश्रो तथा तेश्रो राष्ट्रपतिमा नेकपा एमालेकी विद्यादेवी भण्डारी निर्वाचित भएकी थिइन् । चौथो राष्ट्रपतिका लागि नेपाली काँग्रेसका नेता रामचन्द्र पौडेल र नेकपा एमालेका उपाध्यक्ष सुभाषचन्द्र नेम्वाङ प्रतिस्पर्धामा छन् । कुनै चमत्कारिक परिवर्तन भएन भने संघीय नेपालको चौथो राष्ट्रपतिमा पौडेल निर्वाचित हुने प्रायः निश्चित जस्तै छ । नेपाली काँग्रेसको तर्फबाट उम्मेदवार बनेका पौडेलको पक्षमा प्रतिनिधि तथा प्रदेशसभाको सबैभन्दा ठूलो दल नेपाली काँग्रेसलगायत अन्य नौ दल स्पष्ट रुपमा खुलेका छन् । नेम्वाङले भने अहिलेसम्म आफ्नै दल नेकपा एमालेबाहेक अन्य कुनै दलको समर्थन प्राप्त गर्न सकेका छैनन् । राष्ट्रपति निर्वाचनमा प्रदेशका ५ सय ५० र संघीय संसद्का ३ सय ३२ गरी कुल ८ सय ८२ जना मतदाता रहेका छन् । मतदाताको अन्तिम नामावलीमा नाम रहेको जनता समाजवादी पार्टीकी सांसद सहनाज रहमानको हृदयघातका कारण मृत्यु भएको छ । राष्ट्रपति निर्वाचनमा प्रदेश सांसदको ४८ र संघीय सांसदको ७९ मतभार गणना हुन्छ ।
अहिलेसम्म सत्ता गठबन्धनमा आबद्ध आठ र बाहिर रहेका २ दल गरी १० दलले राष्ट्रपतिका लागि पौडेलको पक्षमा मतदान गर्ने निर्णय सार्वजनिक गरिसकेका छन् । निर्णय सार्वजनिक गर्ने १० दलमा सत्ता गठबन्धनमा रहेका नेपाली काँग्रेस, नेकपा माओवादी केन्द्र, जसपा, नेकपा एकीकृत समाजवादी, लोसपा, नागरिक उन्मुक्ति पार्टी, राजमो, जनमत पार्टी र सत्ता बाहिर रहेका नेपाल समाजवादी पार्टी र आम जनता पार्टी रहेका छन् । राष्ट्रपति निर्वाचनको विषयलाई लिएर नेकपा एमालेसँगको पुस १० गतेको बालकोट सहमति तोड्दै नेकपा माओवादी केन्द्रले फागुन ११ गते नेपाली काँग्रेससहित आठ दलसँग नयाँ गठबन्धन गरेको थियो । प्रदेश तथा संघीय निर्वाचनमा गठबन्धन गरेको काँग्रेसलाई धोका दिँदै एमालेसँगको गठबन्धनमा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ पुस १० गते प्रधानमन्त्री नियुक्त भएका थिए । नेकपा एमालेसँगको तत्कालीन गठबन्धनमा आबद्ध नेकपा माओवादी केन्द्र, जसपा, राष्ट्रिय उन्मुक्ति पार्टी र जनमत पार्टी अहिले पौडेलको पक्षमा छन् भने राप्रपा तटस्थ बसेको र रास्वपा यो समाचार तयार पार्दासम्म कसैको पक्षमा स्पष्ट खुलेको अवस्था छैन । उनीहरुको बैठक बसिरहेको छ ।

निर्वाचन आयोगले जनाए अनुसार राष्ट्रपति निर्वाचनका लागि बिहान १० बजेदेखि तीन बजेसम्मको समय मतदानका लागि तोकिएको छ । बेलुका सात बजेसम्म निर्वाचनको नतिजा सार्वजनिक गर्ने तयारी रहेको निर्वाचन आयोगका प्रवक्ता शालिग्राम शर्मा पौडेलले जानकारी दिए । आयोगले प्रदेश सांसद र संघीय सांसदका लागि छुट्टा छुट्टै मतपत्रको व्यवस्था गरेको छ । पौडेलका अनुसार यसपटक मतपत्रमा उमेदवारको नाम र फोटो समेत राखिएको छ ।