काठमाडौं । नेकपा (एमाले) सांसद रघुवीर महासेठले आफ्नो दलबाट निर्वाचित सांसद लक्ष्मी महतो कोइरी अपराधी भए अघिल्लो सरकारले किन पदक दिएको भन्दै प्रश्न उठाएका छन् । मंगलबारको संसद् बैठकमा उनले अदालतले दोषी ठहर नगरेको व्यक्तिलाई सांसदहरूले अपराधी भन्न नमिल्ने भन्दै आक्रोश पोखे ।

उनले कोइरी अपराधी थिए भने शेरबहादुर देउवा नेतृत्वको तत्कालीन सरकारले किन पक्राउ गर्न नसकेको भन्दै प्रश्न गरे । “अहिले देशमा एउटै चर्चा छ, लक्ष्मी महतो कोइरीको । यही प्रतिनिधिसभामा सांसदहरूले धेरै कुरा उठाउनुभयो । अपराधी भन्ने शब्द पनि प्रयोग भयो । प्रहरीले किन पक्रेन भनेर उठाउने काम भयो । साँच्चै महतो अपराधी हुन् त ? यदि, अपराधी हो भने निर्वचनमा सरकारले सम्मानित र प्रतिष्ठित पदक, समाजसेवी पदकबाट सरकारले सिफारिस गरेर दिने काम उहाँले किन गर्नुभयो रु त्यो बेला अपराधी हेर्नु भएन ?,” उनले प्रश्न गरे ।

सांसद महासेठले घटना भएको सात वर्ष भइसकेको र अदालतले थुनछेकको आदेश दिएको तीन वर्ष बितिसेकको भन्दै यत्रो समय पटक–पटक बनेको सरकारले के हेरेर बसेको भन्दै प्रश्न तेर्साए । राजनीतिमा लागेका धेरै व्यक्तिमाथि कुनै न कुनै मुद्दा लागेको भन्दै उनले अहिले पनि कोइरीलाई महोत्तरीमा लक्ष्मीपूजामा जस्तै दिनैपिच्छे घरघरमा पूजा गर्ने गरिएको जिकिर गरे ।

“बीपी कोइरालादेखि गिरिजाप्रसाद कोइराला मात्र होइन, हाम्रै पार्टीका अध्यक्ष केपी ओली, नेताहरू माधव नेपाल, शेरबहादुर देउवलाई पनि पटक–पटक चार्ज लागेकै हो नि । हिजो प्रधानमन्त्री प्रचण्डको पनि टाउको मूल्य तोकिएकै हो नि । मूल्य तोक्ने र तोकिनेले सँगै मिलेर राजनीति चलाएका छन् । राजनीतिमा जे चल्दो रहेछ,” उनले भने, “लक्ष्मीपूजाको दिनमा घरघरमा लक्ष्मीको पूजा गरेजस्तै महोत्तरीमा उहाँको त्यसरी नै घरघरमा प्रत्येक दिन पूजा हुन्छ । शोषित–पीडित जनताले पूजा गर्छन् । यस्तो चर्चित मान्छे कसरी हत्यारा हुन्छ ?”

उनले कोइरीको नाम लिएर एमाले नेताहरूको समेत विरोध हुने गरेको बताए । उनले साँच्चै कोइरी अपराधी भए एमालेले सहयोग गर्ने र गृह मन्त्रालयले कारबाही गर्न सक्ने बताए ।