कैलालीमा बाढीपछि सयौँ परिवार थाक थलोबाट विस्थापित भएका छन् । ती परिवार सडकउच्च घर तथा विद्यालयमा आश्रय लिएर बसिरहेका छन् । यसरी आश्रय लिएर बसिरहेका मध्ये गर्भवती तथा सुत्केरीलाई समस्या भइरहेको छ । जिल्लाको भजनीमा रहेकाे हुलाकी सडकमा  दुई वर्षमुनिका बालबालिका  पनि छन् । सडकमा बसेका उनीहरु राम्ररी सुत्नसमेत पाएका छैनन् । बाल बालिका र आमाहरुलाई थप समस्या भएको छ ।

भजनीकी मनिषा धमालाको बच्चा अहिले सात महिनाको छ । उहाँको घर बाढीले डुबेपछि उहाँ बच्चा बोकेर ज्यान जोगाउन हुलाकी सडकमा आउनु भयो । बाढीले घर डुब्न थालेपछि एकसरो लुगामा बच्चा बोकेर भागेकी उहाँलाई सडकमा बच्चा स्याहार्न समस्या भएको छ । आफ्नो दूधसँगै घरमा पटकपटक जाउलो,लिटो र थप खानेकुरा खुवाउँथे यहाँ त आफैँ भोकै छु । उहाँले भन्नु भयो। पेटभरि पानी खान पनि पाइएको छैन । गर्मी तथा वातावरण नमिलेर बच्चाले रोएर सताएको छ ।

दीपा सुनार र उहाँको एक वर्षको बच्चाको पनि दुई दिनदेखि सडकमै बास छ । घरमा थप खानेकुरा खान्थ्यो यहाँ त केही पाएको छैन । बच्चा रातभर रोएको छ ।उहाँले भन्नु भयो । यहाँ सडकमा आमाले त खान पाएका छैनौँ बच्चाको बारेमा कसले सोँच्छ । बच्चालाई तयारी लिटो कसैले सहयोग गरेको भए पनि हुन्थ्यो ।

अञ्जली विक बाढी घरमा पसेपछि भिज्दै सडकसम्म आउनु भयो । भिज्दै आएकाले होला उहाँको नौ महिनाको बच्चा बिरामी भइसकेको छ । उहाँको बच्चालाई रुघाखोकी सुरु भएको छ । घाँटीसम्म पुग्ने पानी भएपछि भाग्यौँ बच्चा भिजेर निर्थुक्कै भएको थियो । उहाँले भन्नु भयो।लौ न सरकार भएको महसुस गराइ दिनुपर्यो । हामी त बर्बाद भयौँ ।

भजनीको सोनाहाफाटा खल्लाटोलकी सानु पाण्डेको दुई वर्षको बच्चा छ । घरमा छिन छिनमा खानेकुरा खाने सानुको बच्चाले शनिवार बिहानदेखि चाउचाउ र चिउरामात्रै खान पाएको छ । हामी त दु;ख सुख सहन सक्छौँ ।बच्चाले सहन सकेको छैन ।घर जाउ भन्छ । घर बाढीमा डुबेको छ ।उहाँले भन्नु भयो, लुगा पनि सबै भिजेका छन्, अझै पानी रोकिएको छैन । घरमा के के बग्यो थाहा छैन ।

भजनी नगरपालिकाका स्वास्थ्य संयोजक कैलाश चौधरी प्रभावित क्षेत्रमा स्वास्थ्य समस्या नहोस् भनी स्वास्थ्यकर्मी सडकमै त्याे दिन खटिसकेका जानकारी दिनु भयो । हामी बाढीमा भिजेकामा ज्वरो, रुघाखोकी र पखालाजस्ता समस्या भए भन्ने खबरपछि हुलाकी सडकमै सेवा दिइरहेका छौँँ । स्वास्थ्य चेकजाँच र औषधि वितरण भइरहेको छ । उहाँले भन्नु भयो ।यहाँ आएपछि गर्भवती, सुत्केरी र साना बच्चा पनि रहेछन्, उहाँहरुका लागि केही गर्न सकिएको छैन । अब हामी पोषणमा समेत ध्यान दिन्छौँ ।

हरेक विपद् तथा महामारीका समयमा अन्य मानिस भन्दा महिला, बालबालिका तथा ज्येष्ठ नागरिक बढी समस्यामा पर्छन् । यस्तो बेलामा उनीहरुका समस्यामा बढी संवेदनशील हुन आवश्यक हुन्छ । महिला अधिकारकर्मी निर्मला कडायत विपद्का समयमा राहत तथा सहयोगका कार्यक्रम ल्याउँदा महिला तथा बालबालिकाका विशेष समस्याबारे जानकार हुन आवश्यक हुने बताउनु भयो । सुत्केरी र गर्भवतीलाई अन्य मानिस भन्दा बढी पोषण चाहिन्छ। बालबालिकालाई थप खानेकुरा चाहिन्छ । उहाँले भन्नुभयो, महिला महिनावारी हुन्छन्, । स्यानिटर प्याड चाहियो । शौचालय पानीको व्यवस्थाजस्ता कुरामा स्थानीय सरकार तथा सरोकारवालाले ध्यान दिऔँ ।

यसका साथै विपद्का समयमा हुनसक्ने लैङ्गिक हिंसाका घटनाबारे समेत नागरिक सचेत हुन आवश्यक रहेको उहाँको भनाइ छ । बाढीका कारण कैलालीको भजनीमा हजारौँ परिवार, टीकापुर जानकी र जोशीपुरमा सयौँ परिवार प्रभावित भएका छन् । प्रभावित परिवार उच्च घर , विद्यालय तथा सडकमा बसिरहेका छन् ।”