काठमाडौं । भक्तपुरको चाँगुनारायण नगरपालिका वडा नम्बर ७ मा वडा अध्यक्ष निर्वाचित भएको हप्तादिनमै श्यामकृष्ण नायजु श्रेष्ठविरुद्ध पक्राउ पुर्जी जारी भएको छ । ठगी तथा फौजदारी आरोपमा उनलाई पक्राउ गर्न पक्राउ पुर्जी जारी गरिएको हो ।

वडा अध्यक्ष श्रेष्ठविरुद्ध सरकारी जग्गा बैना गरी कीर्ते गरेको आरोपमा प्रहरीमा उजुरी परेको थियो । सोही आधारमा प्रहरीले अनुसन्धानका लागि अदालतको स्वीकृतिमा पक्राउ पुर्जी जारी गरेको थियो ।
उक्त मुद्दामा प्रहरीले केशवप्रसाद अधिकारी र ईश्वर गाइँजुलाई पक्राउ गरिसकेको छ । तर वडा अध्यक्ष श्रेष्ठसहित चार जना फरार रहेको महानगरीय प्रहरी परिसर भक्तपुरका प्रमुख प्रहरी उपरीक्षक शिवकुमार श्रेष्ठले जानकारी दिए ।