काठमाडौं । जनता समाजवादी पार्टी (जसपा)मा प्रमुख तीन नेताहरुले भागवण्डा गरेका छन् । नेताहरु उपेन्द्र यादव, डा. बाबुराम भट्टराई र अशोक राईले पछिल्लो समयमा भागवण्डा गरेर आफूहरुलाई व्यवस्थापन गरेका छन् ।
भट्टराईले प्रदेश नं. १ प्रदेश प्रमुखमा पर्शुराम खापुबलाई आफ्नो भागमा पारे । त्यस्तै अशोक राईले राष्ट्रिय सभामा हेमराज राईलाई उम्मेदवार बनाए । उपेन्द्र यादवले महम्मद खालिक सिद्धिकीलाई २ नं प्रदेशबाट राष्ट्रिय सभाको उम्मेदवार बनाए । पछिल्लो समयमा पार्टी एकीकरण भएपछि नेताहरु पार्टी संगठनलाई विस्तार गर्नेभन्दा पनि कसरी पार्टीभित्र आफूलाई बलियो बनाउन सकिन्छ भनेर लागेका छन् । अहिले आएर नेता नवराज सुवेदीले असन्तुष्टि व्यक्त गरेका छन् । लुम्बिनी प्रदेशमा आफ्नो पार्टीको राम्रो स्थान भएकोले राष्ट्रिय सभामा त्यो प्रदेशबाट पनि उम्मेदवारी दिनुपर्छ भन्ने अडानमा उनी रहेका थिए । सुवेदी पुराना नेता हुन् । उनी उम्मेदवार बन्ने सोंचमा थिए । पार्टीले सुवेदीको कुरालाई मतलब नगरेपछि उनी असन्तुष्ट बनेका हुन् । उनले उपेन्द्र र बाबुरामबीच दूरी बढेको भनेर भन्दै आएका छन् ।