बर्दिया । वन्यजन्तुबाट जोगिन भन्दै बनाइएका ब्रेकरका कारण उल्टै मानवीय दुर्घटना बढेपछि जिल्ला विपद व्यवस्थापन समितिको निर्णय अनुसार बर्दियाको मधुवन नगरपालिका नगर कार्यपालिकाको कार्यालयको सहयोगमा खाता क्षेत्रको ज्यानमारा ब्रेकर हटाईएको छ ।
मधुवन नगर प्रमुख गणेश बहादुर क्षेत्रीको नेतृत्वमा खाता क्षेत्रमा रहेको मापदण्ड विपरितको ज्यानमारा ब्रेकर हटाउने कार्य सफलतापूर्वक सम्पन्न भएको हो ।
वन्यजन्तुभन्दा मानवीय क्षति हुन थालेपछि ब्रेकर हटाइएको बर्दियाका प्रमुख जिल्ला अधिकारी सन्बहादुर सुनारले बताउनु भयो । हुलाकी सडकअन्तर्गत खाता जैविक मार्गको करिब डेढ किलोमिटर सडक खण्डमा बनाईएको १० वटा ठूला ब्रेकर हटाईएको हो । सवारी साधनबाट वन्यजन्तुको क्षति नहोस् भन्दै करिब ८ महिनाअघि ती ब्रेकर निर्माण गरिएपनि ती ब्रेकरहरु मापदण्ड विपरीतका थिए ।
ब्रेकरका कारण मानिसको ज्यान नै जान थालेपछि स्थानीय बासिन्दाले प्रशासनसँग ती ब्रेकर हटाउन माग गर्दै आएका थिए । ब्रेकरका कारण एकातिर दुर्घटना बढेको र अर्कोतर्फ वन्यजन्तुको आक्रमणको सिकार पनि बन्नु परेपछि ती ब्रेकर हटाइएको प्रजिअ सन्तबहादुर सुनारले बताउनु भयो । ब्रेकर हटाइएपछि हुलाकी सडक भएर खाता, कोठियाघाट, राजापुर क्षेत्र आउजाउ गर्नेहरु खुसी भएका छन् । गत असारयता यस जैविक मार्गमा बाघको आक्रमणमा ६ जनाको मृत्यु भइसकेको छ । यस क्षेत्रमा जतततै दिनहुँ बाघ देखिन थालेको सशस्त्र प्रहरी उपरीक्षक नरबहादुर राउतले बताउनु भयो । बिहीबार यहाँबाट राष्ट्रिय प्रकृति संरक्षण कोषको विशेषज्ञ टोलीले एउटा बाघ नियन्त्रणमा लिएको थियो । यो जैविक मार्ग भारतीय सीमा कतरनियाघाट वन्यजन्तु आरक्षसँग जोडिएको छ ।