बर्दिया । नेकपा (माओवादी केन्द्र) का अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ ले कांग्रेस–एमाले नेतृत्वको वर्तमान सरकारलाई जनताले नरुचाएको दाबी गरेका छन् । उनले अहिलेको सरकार विचौलियाले बनाईदिएको आरोप आजपनि दोहोर्याए ।

बर्दियामा आयोजित बेपता योद्धा कृष्ण प्रसाद थारुको स्मृतिमा बनाईएको शालिकको अनावरण गर्दै प्रचण्डले यस्तो बताएका हुन् । उनले प्रधानमन्त्री केपी शर्मा ओली नेतृत्वको वर्तमान सरकारलाई असंवैधानिक भनेका छन् । अहिले सरकार जनताको भावनालाई कुल्चिएर हिँडिरहेको टिप्पणी गरे ।
उनले भने, ‘अपारदर्शी तरिकाले सरकार ढाल्ने र अर्को गठबन्धन बनाउने काम भयो। त्यो असंवैधानिक र असंवैधानिक छ भनेर मैले भन्दै आइरहेको छु, यो जनताको भावना, आकांक्षा र आवश्यकताको पनि विपरीत छ गलत भएको छ। हामी जनताको साथ जुटाएर भ्रष्टाचारको रक्षा गर्ने, कुशासन कायम गर्ने प्रयासलाई विफल पार्ने संकल्प गरेर हामीले अभियान चलाएको छौँ।’

सो क्रममा उनले काठमाडौंमा फेरि अर्को सशक्त प्रतिवाद गरिने जानकारी गराए । उनले भने, ‘काठमाडौंमा हामीले फेरि अर्को प्रतिवाद गर्नुपर्ने भएको छ, त्यसको लागि आजै हामी काठमाडौं जानुपर्नेछ । काठमाडौंमा पनि लगातार हामीले हस्तक्षेप गरिराख्नुपर्ने छ। नत्र प्रतिगामीहरूले अझै बढी आगजनी, हत्या हिंसा गर्न सक्ने भएकाले हामीले पर्सी नेवार बुद्धिजीवी र नेताहरूले भेलाद्वारा हामीले ठूलो नेवार समुदायको सम्मेलन गर्ने र हजारौँ उपस्थित गराएर खबरदारी गर्ने सोचेका छौँ। त्यसको तयारी गर्न आजै फर्किँदैछौं।’