केही दिनअघि ललितपुरको गोदावरीमा नेपाली कांग्रेसको महासमिति बैठक सकिएको छ । महासमिति बैठकले स्पष्ट रुपमा के निर्णय ग¥यो भन्ने अस्पष्ट नै छ । केबल बैठक गर्नुपर्ने बाध्यता भएकाले नै बैठक बोलाइएको हो कि भन्दा खासै फरक पर्दैन ।

बैठकमा सदस्यहरुले आफ्नो धारणा राख्ने अवसर पनि पाएनन् । बोल्नेहरुले बोल्ने मौका पाए पनि उनीहरुको कुरा सुनुवाई नभएकाले त्यो पनि अर्थहीन भएको छ । महासमिति सदस्यको संख्या ठूलो भएकाले ४ दिन भेला गर्दैमा पार्टीले नयाँ रुप लिने कुरा पनि कल्पनामै सीमित हुन्छ । पार्टीका पदाधिकारीले उठाएका विषयवस्तु सामान्य नै भए पनि निकै चर्चित भए भनें अरुले बोलेका कुरालाई कसैले पनि खासै वास्ता गरेन । बैठकमा सरकारको समीक्षसँगै सत्ता गठबन्धनको कुराले निकै प्राथमिकता पाएको थियो । पार्टी महामन्त्री गगन थापाले नेकपा (माओवादी केन्द्र) को गठबन्धनबारे प्रश्न उठाएका थिए । उनले आगामी निर्वाचनमा कांग्रेसले एक्लै प्रतिस्पर्धा गर्नुपर्ने पनि बताए । उनको कुरा गम्भीर भएकाले धेरैले यो प्रस्तावमा साथ दिएका थिए तर पार्टी सभापति शेरबहादुर देउवाले यो विषय पछि छलफल गर्न सकिने भन्दै पन्छाइदिए । यो विषल उठेपछि प्रतिनिधिसभामा प्रमुख प्रतिपक्षीको भूमिकामा रहेको नेकपा एमाले भनें हौसिएको छ ।

बैठकमा उपसभापति पूर्णबहादुर खड्काले नीति प्रस्ताव, महामन्त्री गगन थापाले सांगठनिक र महामन्त्री विश्वप्रकाश शर्माले समसामयीक राजनीतिक प्रस्ताव प्रस्तुत गरेका थिए । यस्तै प्रवक्ता डा. प्रकाशशरण महतले वर्तमान आर्थिक अवस्था, सम्भावना र भावी दिशासम्बन्धी प्रतिवेदन र लेखा समिति संयोजक श्यामकुमार घिमिरेले लेखा परीक्षण प्रतिवेदन प्रस्तुत गरेका थिए ।