काठमाडौं । निवर्तमान राष्ट्रपति विद्यादेवी भण्डारी गुमनामजस्तै भएकी छिन् । राष्ट्रपतिको दुई पटकको कार्यकाल सकेर बिदा भएकी उनी आजभोलि खासै कार्यक्रममा उपस्थित हुने गरेकी पनि छैनन् ।

राष्ट्रपतिको कार्यकाल सकेर फकिँदै गर्दा उनी फेरि एमालेको राजनीतिमा नै सक्रिय रहने चर्चा गरिएको थियो । राष्ट्रपति हुनुअघि उनी एमालेको उपाध्यक्ष थिइन् । एमालेका तत्कालीन अध्यक्ष केपी शर्मा ओलीले उनलाई दुई पटक राष्ट्रपति बनाएका हुन् । पहिलो पटक राष्ट्रपति हुँदा उनी कुनै विवादमा नपरे पनि दोस्रो कार्यकाल भनें निकै विवादित रहयो । प्रधानमन्त्री भएका ओलीलाई सहज हुने गरी काम गरेकी उनलाई धेरैले देशको होइन ओलीको राष्ट्रपनि भनेर आलोचनासमेत गरेका थिए । ओलीले दुई पटक प्रतिनिधिसभा भंग गर्दा कसैसँग सल्लाह नै नगरी एकहोरो समर्थन गरेपछि भण्डारी पनि मुछिएकी थिइन् । भण्डारीले गरेको कामबाट ओली सन्तुष्ट भए पनि एमालेको एक पंक्ति भनें असन्तुष्ट नै थियो ।

एमालेको एक पंक्ति ओलीसँग वाक्कदिक्क भएर भण्डारीलाई पार्टीको राजनीतिमा सक्रिय गराउन चाहेको थियो । भण्डारीले पनि त्यसमा चासो राखेपछि ओली रुष्ट भएका थिए । ओलीले पार्टीलाई घात गरेको भन्नेहरु भण्डारीलाई आगामी महाधिवेशनमा अध्यक्षको उम्मेदवारका रुपमा अघि सार्न थालिसकेका थिए । यो घटना बाहिर आएपछि ओलीले पार्टीभित्रबाट आफूलाई फाइदा हुने प्रकारका केही निर्णय गरेका थिए । हिजोको दिनमा एमालेमा ओलीको निर्णय नै प्रमुख हुने भएकाले पनि उनको विरोधमा गए आफ्नो राजनीति सकिन्छ भनेर कोही पनि बोलेका थिएनन् । ओलीको विकल्पमा रुपमा भण्डारी देखिन थालेपछि भण्डारीको पक्षमा लाग्नेलाई ओलीले हप्कीदप्की गरेको सञ्चारमाध्यममा आएको थियो ।
एमालेको विधानमा ७० वर्षपछि सक्रिय राजनीति गर्न नपाइने व्यवस्था थियो । ओलीले यो व्यवस्थालाई निलम्बन गरेका छन् । ओली ७० वर्ष पुगिसकेका छन् । अबको तीन वर्षपछि हुने महाधिवेशनमा फेरि अध्यक्ष हुने दाउ गरेका ओलीलाई भण्डारीबाहेक कुनै पनि खतरा नभएकाले पनि उनी ढुक्क छन् ।