काठमाडौं । काठमाडौं महानगरपालिकाले सावजनिक विदाका दिनमा खुलेका विद्यालयलाई कारबाही गर्ने भएको छ । महानगरले आफ्नो निर्णय उल्लंघन गर्दै बिदा नदिएको विषयमा गम्भीर ध्यानाकर्षण भएको जनाएको छ ।

स्थानीय सरकारले गरेको निर्णय पालना नगरेमा प्रचलित कानूनबमोजिम कारबाही हुने महानगरका शिक्षा अधिकारी सीताराम कोइरालाले जारी गरेको विज्ञप्तिमा उल्लेख छ । महानगरले स्थानीय सरकारले गरेको निर्णय अनिवार्य रुपमा पालना गर्न सबैमा अनुरोध पनि गरेको छ । महानरको निर्णयविपरीत काम गरेमा प्रचलित कानूनबमोजिम कारबाही हुने सूचनामा भनिएको छ । सापारु र रोपाइँ जात्राको अवसरमा महानगरले शुक्रबार सार्वजनिक बिदा दिएको थियो तर काठमाडौंका केही बोडिङ भनें सञ्चालनमा आएका थिए ।

प्छिल्लो समयमा तीन तहको सरकार गठन भइसकेपछि ती सरकारले आफू अनुकूल बिदा दिँदै आएका छन् । स्थानीय तहले स्थानीय चाडबाड र पर्वका आधारमा बिदा दिँदै आएको छ । प्रदेश सरकारले दिएका कतिपय बिदा केन्द्रीय सरकार मातहत रहेका कार्यालयले नमान्ने गरेका छन् त्यसैले कुन सरकारको बिदा मान्ने र कसको नमान्ने भन्ने अन्यौलता कायमै रहेको छ ।