काठमाडौं । राष्ट्रिय प्रजातन्त्र पार्टी (राप्रपा) का नवनिर्वाचित अध्यक्ष राजेन्द्र लिङ्देन अहिले पार्टी प्रवेश गराउने अभियानमा छन् । अध्यक्षमा निर्वाचित हुनेबित्तिकै उनी देशव्यापी दौडाहामा निस्केका छन् ।
आफूलाई अध्यक्षमा निर्वाचित गराउन सहयोग गर्नेहरुलाई धन्यवाद दिन र पार्टीलाई आगामी दिनमा कस्तो बनाउने भन्ने छलफलमा निस्केका उनले जनताको भावनालाई सम्बोधन गर्ने गरी पार्टीले गति लिने स्पष्ट पार्दै आएका छन् । गत मंसिर १५ देखि १७ सम्म काठमाडौंमा भएको एकता महाधिवेशनमा उनी तत्कालीन अध्यक्ष कमल थापालाई भारी मतले हराउँदै अध्यक्षमा निर्वाचित भएका थिए । थापाले पार्टीलाई आफ्नो स्वार्थका लागिमात्र प्रयोग गरेको, पार्टीभित्र कुनै निर्णय नै नगरी एकलौटी पाराले पार्टी चलाउन खोजेको, सरकारमा जान भनेपछि मरिहत्ते गरेको, पार्टीको नीति, सिद्धान्त र विचारमाथि पटक पटक प्रहार गरेर पार्टीलाई कमजोर बनाएको आरोप लागिरहेका बेला थापा लिङ्देनसँग नराम्ररी पराजित भएका हुन् । अध्यक्षमा हारेपछि थापाले राप्रपा बलियो बनाउनेभन्दा पनि कमजोर बनाउने र अध्यक्षलाई काम गर्न नदिने अभियान चलाएका छन् ।
हिजोसम्म राजसंस्थाको नाममा राजनीति गर्दै आएका थापाले अहिले अप्रत्याशित रुपले हार खाएपछि आफूलाई हराउन दरवार नै लागेको भनेर लाज ढाक्ने प्रयास गर्दै आएका छन् । लिङ्देन झापा ३ बाट निर्वाचित प्रतिनिधिसभा सांसद हुन् भने थापाले मकवानपुर १ बाट संसदीय निर्वाचन नमज्जाले हारेका थिए । थापालाई नेपाली कांग्रेसको र लिङ्देनलाई नेकपाको समर्थन रहेको थियो । लिङ्देन अहिले गृहजिल्ला झापामा छन् । उनले दिनैपिच्छे हजारौंलाई पार्टी प्रवेश गराउँदैछन् । उनले पार्टीप्रति जनताको आस्था भएकाले पार्टी प्रवेश गर्नेको लहर चलेको बताएका छन् । प्रतिनिधिसभामा राप्रपाबाट जित्ने लिङ्देन एकमात्र सांसद हुन् । जनताको सुखदुःखमा सहभागी हुने र जनताको काममा पार्टीभन्दा माथि उठेर काम गर्ने गरेकाले लिङ्देन पार्टीको लागिमात्र होइन जनतामाझ पनि लोकप्रिय बन्दै गएका छन् । उनी जिल्ला विकास समितिका पूर्व सभापति हुँदा गरेको काम अझै पनि जिल्लावासीले सम्झिइरहेका छन् ।