हेटौँडा । नेपाली कांग्रेसका सभापति शेरबहादुर देउवाले सरकारकै कारण सडकमा राजा आऊ देश बचाऊको नारा लागेको बताएका छन् ।
हेटौँडामा सोमबार कांग्रेसको विरोध सभालाई सम्बोधन गर्दै देउवाले बेथिति, भ्रष्टाचार, अराजकता बढेर गएपछि बाध्य भएर सरकारविरुद्ध प्रदर्शन गर्नु परेको बताए । देउवाले प्रधानमन्त्री केपी ओलीनै राजावादीसँग मिलेको त होइन भन्ने आशंका गरेका छन् ।
देउवाले राजावादीहरुको आन्दोलनका लागि ओली सरकार नै जिम्मेवार रहेको बताए । उनले भने, ‘ओली नै राजासँग मिलेको भए थाहा छैन । ‘कसैलाई भ्रम नहोस्, राजा आउनेछैन’, देउवाले भनेका छन् ।
देउवाले कम्युनिष्टले जितेपछि रून पाइँदैन भनेर आफूले पहिले नै भनेको स्मरण गरेका छन् । आज रूनेलाई जेल हाल्ने काम भइरहेको उनले बताएका छन् ।
‘मैले भनेको थिएँ कम्युनिष्टले जितेपछि रून पाइन्न भनेको थिएँ आज किन रोइस् भनेर सरकारले जेल हाल्दैछ, त्यो कोरोनाले रोएको होस् कि खान नपाएर’, उनले भनेका छन् ।