काठमाडौँ । प्रतिनिधि सभा विघटनविरुद्ध नेपाल कम्युनिष्ट पार्टी नेकपाको दाहाल–नेपाल समूहले आज काठमाडौंमा शक्ति प्रदर्शन गर्ने भएको छ । उपत्यकाका विभिन्न ठाउँबाट जुलुस निकालेर सो समूहले काठमाडौँको मृकुटीमण्डपमा विशाल शक्ति प्रदर्शन गर्न लागेको हो ।
सभालाई दाहाल–नेपाल समूहका अध्यक्षद्धय पुष्पकमल दाहाल र माधव कुमार नेपालले सम्बोधन गर्नेछन् । बाहिर जिल्लाबाट समेत कार्यकर्ता ल्याएर आजको प्रदर्शनमा एक लाख बढी कार्यकर्ता काठमाडौँमा उतार्ने दाहाल नेपाल समूहले जनाएको छ । शक्ति प्रदर्शनका लागि शुक्रबार बिहानैदेखि बाहिर जिल्लाबाट कार्यकर्ता आउन थालेका छन् ।
उपत्यकाका माइतीघर, डिल्लीबजार, लैनचौर, त्रिपुरेश्वर, कुपण्डोल, प्रदर्शनीमार्ग, त्रिचन्द्र कलेज, शान्तिबाटिका लगायतका ठाउँबाट निकालिएको जुलुस भृकुटीमण्डप पुगेर विशालसभा परिणत हुनेछ ।
सर्वोच्चको संवैधानिक इजलासमा सुनुवाइ भइरहेपनि दाहाल–नेपाल समूहले भने सडक संघर्षका कार्यक्रम गर्दै आएको छ ।