काठमाडौं । पूर्वराजा ज्ञानेन्द्र शाहले प्रजातन्त्र दिवसको पूर्वसन्ध्यामा एउटा भिडियो वक्तव्य जारी गर्नु भएको छ । फागुन ६ अर्थात बुधबार जारी भिडियोमा उहाँले राष्ट्र, राष्ट्रियताको कुरालाई अघि सार्नु भएको छ । उहाँले यही फागुन २१ गते हुने भनिएको निर्वाचनले खासै निकास दिन नसक्ने धारणा उहाँले राख्नु भएको छ । उहाँले देशको समस्याहरुका विषय सबैले बसेर छलफल गरी समाधान खोजिनु पर्ने धारणा पनि राख्नु भएको छ । उहाँले आगामी निर्वाचनबाट पनि आउने परिणाम अहिलेकै जस्तो हुने अवस्थालाई ख्याल गरी निर्वाचन रोकिनु पर्ने धारणा राख्नु भएको छ ।

पूर्वराजा ज्ञानेन्द्रले आफ्नो देशको समस्या आफूहरुबाटै खोजिनुपर्ने कुरा पनि आफ्नो सन्देशमा दिनु भएको छ । उहाँले २००७ सालमा नेपालमा आएको प्रजातन्त्रको सम्झनामा फागुन ७ गते प्रजातन्त्र दिवसको रुपमा मनाइँदै आएको भनी पूर्वसन्ध्यामा आफ्नो वक्तव्य जारी गर्नु भएको हो ।

यो वक्तव्यलाई लिएर विभिन्न खाले प्रतिक्रिया आउन थालेका छन् । विभिन्न राजनीतिक दलहरुले निर्वाचनमा मुलुक होमिइसकेको अवस्थामा निर्वाचन रोक्न नसकिने धारणा राखेका छन् । राजाको यो धारणा निर्वाचन प्रक्रिया अघि आएको भए यस विषयमा सोच्न सकिने अवस्था रहने भन्नेमा उनीहरु पुगेका छन् ।
राजाले देशको माटो सुहाउँदो व्यवस्थाको कुरा उठाएकोलाई पनि अर्थपूर्ण रुपमा हेरिएको छ । राजाले यो कुरा नेपाली जनताको चाहना अनुसारको राज्यव्यवस्था हुनुपर्ने भन्ने मनसाय राखेको देखिएको छ । राजाको चाहना भने राजादेखि रंकसम्मलाई समेटेर नेपालको लागि सुहाउँदो राज्यव्यवस्थाको कुरालाई समेट्नु भन्ने रहेको पनि बुझिएको छ ।

राजाको यो अश्त्र केही दिनअघि झापाबाट काठमाडौं फर्किंदा राजाको स्वागतका लागि नेपालीजन काठमाडौंमा उत्रिएबाट राजा उत्साहित बन्नाले आएको बुझिएको छ । उक्त दिन त्रिभूवन विमानस्थलदेखि महाराजगञ्जसम्म राजालाई स्वागत गर्न मानिसहरुको भीड लागेको थियो ।

त्यसो त गणतन्त्र राजासँगको गरिएको सम्झौताविपरित रुपमा ल्याइएको भन्नेमा राजा ज्ञानेन्द्रको बुझाइ रहेको बताइएको छ । यसअघि गणतन्त्रभन्दा पनि राजतन्त्रलाई संवैधानिक राजतन्त्रको रुपमा राखी राजसंस्था नफ्याल्ने सम्झौताविपरित दलहरु गएको भनी राजाको गुनासो रहँदै आएको बताइन्छ ।
गत भदौ २३ र २४ गतेको नवपुस्ता (जेन–जी) को आन्दोलनपछि नयाँ सरकार बन्ने समयमा पनि राजतन्त्रलाई फर्काइने हल्ला चलेको थियो । त्यो बेला राजा ज्ञानेन्द्रले उक्त आन्दोलनमा गोली लागी शहादतप्राप्त व्यक्तिहरुको दोष आफूमाथि आउने भनी राजाको रुपमा राज्यरोहण गर्न नमाने पनि चर्चा चलेको थियो । त्यही बेला नै यो घोषित निर्वाचनको समयभन्दा अघि नै राजालाई स्थापित गरिने भन्ने चर्चा पनि चलेको थियो ।

कतिपयले राजाको यो वक्तव्य सोही बेलाको कुरासँग मेल गरी हेर्ने गरेको पनि पाइएको छ । यस्तो हुनुमा निर्वाचनले निकास दिने सम्भावना कमै रहने भन्ने कुरा पनि हो । आगामी निर्वाचनले पनि समानुपातिक व्यवस्थाका कारण कुनै पनि दलको स्पष्ट बहुमत नआउने संभावना रहेको भनी बुद्धिजीवीहरुले भन्दै आएका छन् ।
सोही कुरालाई राजाले पनि मनन गरी आफ्नो अभिव्यक्ति ल्याएको भन्नेहरु पनि छन् ।

उता, निर्वाचनको माहौल गरमागरम बनिरहेको छ । अघिल्ला निर्वाचनहरुमा प्रमुख प्रतिस्पर्धी दलका रुपमा रहँदै आएका नेपाली कांग्रेस र नेकपा (एमाले) अहिले आफ्नो पुरानो साखलाई जोगाउन लागि परेका छन् । सबैभन्दा ठूलो दल कांग्रेसले आफ्नो दलमा नयाँ नेतृत्व (गगन कुमार थापा) ल्याई चुनावमा आफ्ना अजेण्डासहित प्रस्तुत भएको छ ।

यसैगरी दोस्रो ठूलो दल एमाले पनि आफ्नो पुरानो हैसियतलाई जोगाउन लागि परेको छ । एमालेका लागि अध्यक्ष खड्गप्रसाद शर्मा ओलीका कारण अन्य दलसँग प्रतिस्पर्धा गर्न अप्ठ्यारो परिरहेको बताइने गरेको छ । यसो हुनुमा गत भदौ २३ र २४ गतेको आन्दोलनको मर्मलाई एमालेले बुझ्न नसकेको भन्ने छ । यसैगरी नयाँपुस्ताका मानिसहरुले २३ र २४ गतेको विध्वंश हुनुमा ओली नै मुख्य जिम्मेवार रहेको भनी प्रचार गर्ने गरेका छन् ।

यस्तो अवस्थामा रहेका कांग्रेस उत्साहपूर्वक सक्रिय देखिएको छ भने एमाले आफूलाई जोगाउनका लागि विभिन्न प्रयास गरिरहेको बताइन्छ ।
उता, यो निर्वाचनबाट राष्ट्रिय स्वतन्त्र पार्टी आफूलाई नयाँ शक्तिको रुपमा स्थापित गर्ने मनसायमा रहेको देखिन्छ । रास्वपाले बालेन्द्र शाह (बालेन) लाई भावी प्रधानमन्त्रीको रुपमा अघि सारेको छ । विभिन्न ठाउँहरुमा बालेन पुग्दा देखिएको भिडका आधारमा रास्वपाले आफूलाई धेरै अघि बढेको अवस्थामा बुझ्ने गरेको बताइएको छ ।

भिडकै आधारमा रास्वपाका नेता तथा उम्मेदवारहरुले अन्य दल तथा उम्मेदवारहरुलाई गन्न छोडेको पनि बताइएको छ । ‘रास्वपामा अहंकार देखिएको छ । यो दलमा आवद्धहरुले अरुलाई गन्न छाडेका छन् । नराम्रो सबै काम तथा कर्म जति पुरानै दलको भन्ने भाष्य स्थापित गर्ने कार्यमा रास्वपा तल्लीन रहेको छ ।’ भन्ने धारणा अधिवक्ता चन्द्रप्रसाद लुइँटेलको छ । उहाँ भन्नु हुन्छ, ‘अरुलाई पुरानो दल भन्ने रास्वपा पनि पुरानो दल हो । यसअघिको आमनिर्वाचनमा भाग लिई सरकारमा समेत गैसकेको रास्वपाले आफूलाई नयाँ भन्दै हिंड्नु नै गलत छ ।’
त्यसो त रास्वपाका नेताहरुमा अहंकार बढेको चर्चा छ । विभिन्न स्थानमा मत माग्न जाने क्रममा मतदाताले कुनै कुरा उठाउँदा उम्मेदवारहरु समेत आक्रोशित हुने गरेको देखिएको छ । आफ्नो दलको अजेण्डा लिएर मतदाता समक्ष पुग्नुपर्नेमा उम्मेदवारहरु नै अरु दलका समर्थकहरुलाई ‘हनुमान’ भनी भन्न थालेको अवस्था छ ।

यसरी कांग्रेस र एमाले आफ्नो साखलाई जोगाउने कर्ममा लागेका छन् । उता, रास्वपा भने भिडलाई हेरेर आफूलाई अहंकारीको रुपमा प्रस्तुत गर्दै गएको भनी टिप्पणी हुन थालेको छ ।