काठमाडौं । नागरिक उड्डयन प्राधिकरणका महानिर्देशक प्रदीप अधिकारीलाई अख्तियार दुरुपयोग अनुसन्धान आयोगले मंसिर १७ गते भ्रष्टाचारको अभियोगमा पक्राउ गरेको छ । अधिकारीको विषयमा अख्तियारमा भ्रष्टाचार बारेको थुप्रै उजुरीहरु परेको थियो । पहिल्लो समय भक्तपुरको नलिञ्चोकमा हेलिप्याड निर्माणमा भएको व्यापक अनियमितता गरेको आरोपमा उनी पक्राउ परेको समाचार श्रोतले बताएको छ ।
प्राधिकरणले भक्तपुरको नलिञ्चोकमा आफ्नो स्वामित्वमा रहेको ३२ रोपनी जग्गामा हेलिप्याड बनाउँदा अनियमितता भएको विषयमा उजुरी परेको थियो । पोखरा र गौतमबुद्ध अन्तर्राष्ट्रिय विमानस्थल निर्माण गर्दा अधिकारीले गरेको ब्रम्हलुटलाई अख्तियारले खासै चासो देखाएको थिएन । काँग्रेस, नेकपा समाजवादी र माओवादीका तात्कालिन मन्त्रीहरुलाई प्रभावमा पारेर अधिकारीले नागरिक उड्डयन प्राधिकरणमा लुटको खेती गर्दै आएको जानकारहरुले बताएका छन् । खासगरी नेकपा एसका प्रेमबहादुर आले, माओवादीका सुदन किराँती, हितबहादुर तामाङ र काँग्रेसका बद्री पाण्डे डिजी अधिकारीको दानापानीमा रमाउने गरेको त्यतिबेला चर्चा चलेको थियो ।