काठमाडौं । नेकपा एमालेनिकट रिटर्नी फेडेरेसनको प्रथम राष्ट्रिय महाधिवेशन चैत्र ११ र १२ गते काठमाडौंमा हुने भएको छ ।

फेडेरेसनको केन्द्रीय समितिले बुधबार पत्रकार सम्मेलन गरी महाधिवेशनको तयारी पूरा भएको जनाएको छ । धुम्बाराहीको एक पार्टी प्यालेसमा हुने महाधिवेशनको एमाले अध्यक्ष केपी शर्मा ओलीले उद्घाटन गर्ने कार्यक्रम रहेको छ । एमालेनिकट विदेशबाट फर्किएकाहरु एकजुट भई यो संस्थाको स्थापना गरेको बिन्दु घिमिरेले बताइन् । उनले फेडेरेसनमा आबद्ध हुनेको संख्या बढदै गएको जनाएकी छिन् । २०७८ पौष १६ गते चन्द्रबहादुर रोकाको अध्यक्षतामा ९९ सदस्यीय कमिटी गठन गरेको फेडेरेसनले ५ प्रदेशमा र ५४ जिल्लामा जिल्ला तथा पालिका कमिटी गठन गरिसकेको छ । फेडेरेसनका केन्द्रीय सदस्य तथा काठमाडौं जिल्ला इन्चार्ज ज्ञानु खवासले विदेशमा बसेर सीप र ज्ञान आर्जन गरेसँगै स्वदेश फर्किएकाहरुलाई एकीकृत गर्न फेडेरेसनको स्थापना गरिएको बताए ।

फेडेरेसनले देशका युवाशक्ति विदेशिँदै गएकोमा चिन्ता व्यक्त गरेको छ । फेडेरेसनले विदेशबाट फर्किएको प्रतिभा र जाँगरिलो जनशक्तिलाई परिचालन गर्ने पक्षमा सरकार निस्क्रिय रहेको आरोप पनि लगाएको छ ।