काठमाडौं । आज विहान वरिष्ठ पत्रकार देवेन्द्र गौतमको निधन भएको छ ।
नयाँ करेन्ट साप्ताहिकका सम्पादक एवं प्रकाशक गौतम बी एण्ड बी अस्पतालको भेन्टिलेटरमा उपचारका क्रममा निधन भएको हो । गौतमलाई न्युमोनिया देखिएपछि आईसियुमा उपचार गरिंदै भेन्टिलेटरमा राख्नुपरेको थियो । सम्पादक समाज नेपालका पूर्व अध्यक्ष, नेपाल पत्रकार महासंघका का,वा, पूर्व सभापति ७७ वर्षीय गौतमलाई कोभिड संक्रमणबाट मुक्त भएपछि पनि श्वासप्रश्वासमा गाह्रो भएपछि अस्पतालमा भर्ना गरिएको थियो ।

पाँच दशक लामो सक्रिय र स्वतन्त्र पत्रकारिता जीवनमा उनले सधैं प्रजातन्त्रका पक्षमा कलम चलाएका थिए । पञ्चायत कालमा अभिब्यक्ति स्वतन्त्रताका पक्षमा उभिंदा गौतमबाट सम्पादन प्रकाशन हुने झण्डै एक दर्जन पत्रिकालाई प्रशासनले रोक लगाएको थियो ।

२०४२ को बम काण्डका बेला रामराजाप्रसाद सिंहको भाषण अंश छापेको निहुँमा छ महिना हनुमानढोकामा थुनिएको थियो । त्यहीँको अनुभवमा गौतमले अनुसन्धानभित्रको अनुसन्धान पुस्तक लेखेका थिए ।

उनलाई नेपाल सरकारले सुप्रबल जनसेवाश्री पदक प्रदान गरेको छ। सुपुत्र किरण गौतमका अनुसार गौतमको अन्तेष्टि अहिले बिहान पशुपति आर्यघाटमा हुनेछ ।