काठमाडौं । काठमाडौंको त्रिपुरेश्वरमा रहेको विश्व निकेतन मावि देशभरकै उत्कृष्ठ १६ औं विद्यालय घोषित भएको छ । शिक्षा, विज्ञान तथा प्रविधि मन्त्रालयको शैक्षिक गुणस्तर परीक्षण केन्द्रले गरेको मूल्यांकनमा यो विद्यालय १६औं स्थानमा आउन सफल भएको हो । देशभरका निजी र सामुदायिक विद्यालयको मूल्यांकन गर्दा यो विद्यालय काठमाडौं जिल्लाको दोश्रो उत्कृष्ठ विद्यालय बनेको छ ।
४ हजार ८ सय ६७ विद्यालयको मूल्यांकन परीक्षण केन्द्रले गरेको थियो । विश्व निकेतनले ८७.०३ नम्बर पाएको छ । विद्यालयका प्रधानाध्यापक हेरम्बराज कँडेलले अभिभावक, विद्यार्थी, शिक्षक, कर्मचारी, विद्यालय व्यवस्थापन समिति, जनप्रतिनिधि, शुभचिन्तक, समुदाय र अन्यको सहयोगमा विद्यालयले प्रगति गरेको बताए । प्रधानाध्यापक कँडेलले आगामी दिनमा पनि विद्यालयलाई उत्कृष्ठ बनाउँदै लाने प्रतिबद्धता जनाए । परीक्षण केन्द्रले भदौ २३ गते यो नतिजा सार्वजनिक गरेको हो ।
२००३ साल माघ १९ गते स्थापना भएको यो विद्यालयमा अहिले ४ हजार ६ जना विद्यार्थी अध्ययनरत छन् । प्रधानाध्यापक कँडेलले विद्यालय उत्कृष्ठ घोषित भएपछि सरकारले केही सहुलियत दिने बताए । विद्यार्थीको संख्या, भौतिक पूर्वाधार, नियमित पठनपाठन, विद्यालयको वातावरण, कक्षा कोठाको अवस्था लगायतको मूल्यांकन गरेर परीक्षण केन्द्रले यो नतिजा प्रकाशन गरेको हो । प्रधानाध्यापक कँडेलले सामुदायिक विद्यालयप्रतिको विश्वास बढाउन आफू लागिपरेको बताएका छन् । ‘नियमित रुपमा विद्यार्थीहरु भर्नाका लागि आउँछन् सबै विद्यार्थीलाई भर्ना लिन सम्भव छैन’ प्रधानाध्यापक कँडेलले भने ‘धेरै दुःख र संघर्ष गर्दै यहाँसम्म आएका छौं, अबको दिनमा पनि यो विश्वासलाई थप मजबुद बनाउँदै लैजाने छौं ।’